Bandarísk kona sem leitar ráða í Facebook-hópi sem ætlaður er fyrir ráðleggingar til handa þeim sem hyggja á Íslandsferð ber sig afar illa. Konan segir að til hafi staðið að hún færi til Íslands í haust ásamt kærastanum sínum til að halda upp á afmælið hennar. Hún segir hins vegar ferðina vera í uppnámi. Kærastinn hafi einfaldlega látið sig hverfa. Hann ætli bersýnilega ekki með henni til Íslands og hún sé afar smeyk við að fara ein.
Konan segir í færslunni að hún hafi bókað flug til Íslands og hótelgistingu. Kærastinn hafi sagst ætla með henni en hann hafi aldrei keypt sér flugmiða til Íslands og segist konan í raun hafa átt að vita betur en að búast við því að hann myndi standa við orð sín. Kærastinn hafi einfaldlega látið sig hverfa og svari ekki skilaboðum hennar (e. ghosted). Þótt sambandinu hafi ekki formlega verið slitið þá virðist konan telja það ljóst að það sé á enda:
„Ég er tilfinningalega eyðilögð og nú til viðbótar við það stend ég frammi fyrir því að fara ein í þessa ferð. Það er ekki hægt að fá flugfarið og hótelgistinguna endurgreidd. Ég er fráskilin, á fimmtugsaldri og er ekki hrifin af því að ferðast ein utan Bandaríkjanna. Barnið mitt má ekki missa neitt úr skóla og enginn af vinum mínum getur komið með. Ég vil ekki keyra ein í erlendu landi,“ skrifar konan og óskar að lokum eftir ráðleggingum um hvaða ferðir á vegum á ferðaþjónustuaðila sé best að bóka sig í og einnig óskar hún eftir hvers kyns hugmyndum fyrir einhleypa konu sem er ein á ferð á Íslandi.
Fjölmargar athugasemdir eru ritaðar við færslu konunnar þar sem hún er hvött til dáða og ráðlagt að hika ekkert við að fara ein til Íslands:
„Þetta hljómar eins og byrjunin á rómantískri gamanmynd. Ég vona að þú farir og verðir ástfangin af myndarlegum heimamanni.“
Konan svarar þessari athugasemd og segir þetta ólíklegt en hún sé ánægð með þessa hugsun.
„Þetta er spá. Þú ferð og munt elska það. Hin ótrúlega fegurð og glæsileiki Íslands mun ýta öllum vandræðum þínum til hliðar.“
„Láttu ekki skítseiðið eyðileggja ferðina fyrir þér.“
Fjöldi kvenna tekur til máls í athugasemdum og segir það alveg óhætt fyrir konur að ferðast einar á Íslandi og sumar hvetja konuna til að vera ekkert feimin við að leigja sér bíl og keyra sjálf.
Ein kona segist hafa upplifað sams konar aðstæður og segir að ferðalagið muni gera henni gott.
Konunni er bent á ýmsar ferðir ferðaþjónustuaðila sem mælt er með og einnig er henni ráðlagt að fara í sund.
Ein kona segist hafa upplifað það sama og ráðlegging hennar er einföld:
„Ég fór ein til Íslands á síðasta ári, hálfu ári eftir að ég hætti með kærastanum mínum. Það var það besta sem ég hefði getað gert … Farðu í ferðina, gerðu þér grein fyrir að þinn fyrrverandi er algjört skítseiði, skemmtu þér stórkostlega og leyfðu sjálfri þér að verða ástfangin af Íslandi. Það er stórkostlegt land og þú munt elska það.“
