Bjarni Snæbjörnsson, leikari og athafnastjóri með meiru og Bjarmi Fannar, vöruhönnuður og yfirflugþjónn hjá Icelandair, giftu sig þann 21. júní síðastliðinn.
„Í hjörtum okkar ríkir þakklæti fyrir það að búa í landi þar sem við tveir getum gifst manneskjunni sem við elskum,“ segja Bjarni og Bjarmi sem hafa verið saman í nokkur ár. Um helgina birtu þeir færslu á samfélagsmiðlum þar sem þeir segja frá því að þeir hafi ákveðið með stuttum fyrirvara að gifta sig á viðburði Siðmenntar, Hoppað í hnapphelduna, í Ráðhúsi Reykjavíkur.
„Föstudaginn 21. júní þurfti að þrífa bílinn, sækja hundapössunarpíuna á Keflavíkurflugvöll (því við vorum á leið til Ítalíu) skúra og græja og gera.
Við ákváðum að skjóta því inn í dagsplanið að gifta okkur á viðburði Siðmenntar “Hoppað í hnapphelduna” í Ráðhúsi Reykjavíkur.
Bjarmi bjó til fallega barmskreytingu á jakkana okkar, við skunduðum prúðbúnir í miðbæ Reykjavíkur og áttum dásamlega stund með Ingu Auðbjörgu.
Einu vitnin voru tónlistarfólkið, starfsmenn Siðmenntar og endurnar á tjörninni því við vildum gera þetta einir; ekki einu sinni foreldrar okkar fengu að koma þó þau hafi vitað af ráðahagnum því þau þurftu að vera vottar.
Þannig fögnuðum við ástinni á fullu tungli, á fyrsta degi í krabbamerkinu og á sama sólarhring og sumarsólstöður. Það var magnað, fallegt, satt, rétt, effortless, einfalt og kærleiksríkt. Fullkomið fyrir okkur.
Í hjörtum okkar ríkir þakklæti fyrir að búa í landi þar sem við tveir getum gifst manneskjunni sem við elskum.
Gleðilegt sumar elsku öll – lifi ástin.“
Eftir athöfnina drifu hjónin sig síðan til Ítalíu sem átti upphaflega að vera sumarfrí, en varð að brúðkaupsferð.
View this post on Instagram
