Kvikmyndaleikarinn heimsfrægi Kevin Bacon hefur greint frá því í viðtali við tímaritið Vanity Fair að nýlega hafi hann farið í dulargervi út á meðal fólks til að prófa hvernig það væri að vera venjulegur maður. Hann segir reynsluna hafa verið ömurlega og hann vilji miklu frekar vera frægur og að fólk beri kennsl á hann á almannafæri.

NBC greinir frá þessu.

Bacon segist hafa verið með gervitennur, gervinef, gleraugu og hatt.

Hann segist hafa verið viss um að einhver myndu samt þekkja hann af því hann væri svo þekktur. Þess vegna hafi hann farið til förðurnarmeistara sem sérhæfir sig í sérstökum leikgervum fyrir t.d. hryllingsmyndir. Bacon segist hafa eftir heimsóknina líkst nokkuð persónu sem hann leikur í hryllingsmyndinni MaXXXine sem verður frumsýnd í Bandaríkjunum á morgun.

Bacon hélt því næst í vinsæla verslunarmiðstöð í Los Angeles. Hann segir að fjölmenni hafi verið á svæðinu en enginn hafi þekkt hann. Honum hafi brugðið nokkuð að fólk hafi sýnt honum litla vinsemd. Það hafi troðið sér framhjá honum, enginn hafi tjáð honum aðdáun sína og síðan hafi hann þurft að bíða í biðröð til að kaupa sér „andskotans“ kaffi. Hann hafi fljótt farið að hugsa með sér að þetta væri ömurlegt og langað að verða aftur frægur.

Kevin Bacon sló fyrst í gegn fyrir meira en 40 árum og er orðinn 65 ára gamall.

.