Á mánudag horfði nær hálf milljón Ísraela á Ísland í fyrsta þætti níundu þáttaraðar HaMerotz LaMillion 9 eða HaMerotz LaMillion 2024. Þættirnir eru ísraelsk útgáfa hinna bandarísku sjónvarpsþátta The Amazing Race, sem sýndir hafa verið óslitið frá árinu 2001 eða í 36 þáttaröðum.
Þættirnir snúast um um nokkur tveggja manna lið sem keppast um með því að ferðast um fjölda áfangastaða víðs vegar um heiminn, leysa þrautir og fleira, og verða fyrst í mark til að vinna eina milljón af gjaldmiðli viðkomandi lands. Í þessu tilviki milljón shekel eða um 37 milljónir íslenskra króna. Eitt lið, það síðasta í mark, fellur út í hverju þætti.
Bryndís Loftsdóttir framkvæmdastjóri Félags íslenskra bókaútgefenda átti óvænta innkomu í fyrsta þættinum, sem tekinn var upp í maí í fyrra, þar sem hún aðstoðar systurnar Racheli Mizrahi og Miri Eliezer, sem eru rammvilltar í miðbænum, við leit þeirra að Bæjarins bestu.
„Ég varð óvart þátttakandi í ísraelskum raunveruleikaþætti í maí í fyrra þegar ég brást við hjálparköllum örvæntingafullra ferðamanna sem virtust villtir. Ég leiðbeindi þessum stórkostlegu systrum niður á Bæjarins bestu og í kvöld var þátturinn loksins sýndur í Ísrael. Þetta er líklega hápunktur sjónvarpsferils míns og heimsfrægðar. Vona að ég hitti systurnar einhver tímann aftur, þær voru ógleymanlegar. Algjörar stjörnur.“
Þátttökuliðin í HaMerotz LaMillion 2024 eru þrettán, hvert þeirra skipað tveimur einstaklingum sem eru tengdir með einhverjum hætti; makar, systkin, feðgin, bestu vinir og svo framvegis. Kapphlaupið hófst á Íslandi og heldur keppnin áfram á Spáni, í Marokkó, Mongolíu og Nýja-Sjálandi auk fleiri áfangastaða.
Keppendur hófu leik við Kötlu þar sem einn í hverju liði þurfti að leiðbeina félaga sínum við ísklifur til að ná sex pússlum sem saman mynduðu eitt pússluspil. Því næst var keppendum fyrirskipað að keyra til Reykjavíkur þar sem þeir áttu að finna stað sem tengdur er bandarískum forseta. Keppendur áttu þar að átta sig á því að um væri að ræða Bæjarins bestu þar sem Bill CLinton fékk sér pylsu árið 2004.
Kapphlaupið á Íslandi heldur síðan áfram í þætti tvö sem sýndur var í gær, þar sem keppendur heimsóttu Hallgrímskirkju, seldu bollur á Laugavegi og héldu síðan á bóndabæ til að finna næstu vísbendingu. Næst er svo ferðinni heitið til Marokkó.
View this post on Instagram
View this post on Instagram
