Íbúar enska smábæjarins Allington í Lincolnskíri eru allt annað en sáttir við fjögurra daga kynlífshátíð sem fram fór í næsta nágrenni við bæinn um helgina.

Swingathon heitir hátíðinn sem stærir sig af því að vera ein fjölmennasta kynlífshátíð Bretlandseyja. Yfir 1.000 gestir mættu til leiks og borguðu tugi þúsunda fyrir aðgöngumiðann enda nóg um að vera fyrir áhugasama. Meðal annars var boðið upp á ýmiskonar leiktjöld, heita potta, froðudiskó, kynlífsdyngjur sem og dagskrárliði eins og butt-plug bingó, hvers framkvæmd verður ekki reynt að útskýra í þessari frétt.

Sérstök áhersla er á hverskonar blæti á hátíðinni og því mátti sjá leðurklætt fólk hópast á hátíðina með ýmiskonar tæki og tól meðferðis.

Í umfjöllun Daily Mail um viðburðinn kemur fram að fjölmargir íbúar hins friðsæla bæjar hafi ekki getað sofið fyrir frygðarstunum og orgum þátttakenda sem hafi staðið nánast linnulaust yfir dagana fjóra. Kvörtunum hafi rignt inn til lögreglu og bæjaryfirvalda og að íbúar séu afar ósáttir við að leyfisnefnd bæjarins hafi gefið viðburðinum grænt ljós.

Skipuleggjendur hátíðarinnar eru þó vígreifir og segja að þrátt fyrir einhverja neikvæðni hafi margir bæjarbúar verið hinir kátustu með viðburðinn. Stefnt er að því að endurtaka leikinn að ári.