Líklega kannast lesendur við teiknimyndapersónuna Stjána bláa, sjóarinn með þykku framhandleggina sem varð að ofurmenni ef hann borðaði spínat. Færri vita að Stjáni blái er byggður á raunverulegum manni.
Fyrirmyndin að teiknimyndapersónunni var frægur í Illinoise á þriðja áratug síðustu aldar. Hann var reyndar enginn sjóari heldur annálaður slagsmálahundur sem fáir áttu roð í.
Frank „Rocky“ Fiegel hefði líklega verið afreksmaður í hnefaleikum hefði hann stundað íþróttina. Hann af pólskum uppruna og eftir langan vinnudag fór hann á barinn þar sem bauð mönnum birginn í von um að komast í slag. Hann naut þess að geta sýnt yfirburði sína hvað hörku og styrk varðaði. Hann átti erfitt með að tolla í vinnu en gekk þó ágætlega eftir að hann gerðist barþjónn, sem hentaði lífsstíl hans vel.
Kona frá Chester lýsti honum sem hávöxnum sterkum „alltaf tilbúinn í slag og endaði alltaf sem sigurvegarinn.“
Þessi harðjaxl var þó mjúkur inn við beinið, hann elskaði börn og var þekktur í bænum sínum fyrir að eiga alltaf nóg af sælgæti. Eftir langa vakt á barnum settist hann gjarnan í stól þar fyrir utan til að fá sér pípu. Þreytan sagði til sín og dottaði hann gjarnan með pípuna í munninum, börnum til mikillar gleði sem gerðu sér að leik að stríða honum. Þau vöktu hann með öskrum og þá rauk hann á fætur og otaði hnefanum að þeim, þó af lítilli alvöru. Hann var verndari barnanna og ef einhver stríddi þeim eða beitti órétti þá var Fiegel að mæta. Frændi hans rifjaði síðar upp að eitt sinn hafði hann lent í hrekkjusvíni. „Þá kom Rocky og vék sér að honum, hrekkjusvínið tók upp hníf en Rocky lét það ekki stöðva sig.“
Eitt barnanna sem fékk gjarnan góðgæti hjá Fiegel var teiknarinn E.C. Segar sem er einmitt höfundur Stjána bláa.
Fiegel og Stjáni blái eiga meira sameiginlegt en styrk og hörku. Þeir voru líka svipaðir í útliti. Eins og Stjáni þá var Fiegel með eitt auga, framstæða höku og báðir elskuðu að reykja tóbak með pípu.
Fyrst átti Stjáni blái bara að vera gestur í myndasögunni sem Seger var að teikna fyrir, Thimble Theatre. Hann varð þó fljótt svo vinsæll að fáir muna í dag hver í upphafi var aðalpersónan í myndasögunni. Stjáni blái eignaðist marga aðdáendur á fjórða áratugnum. Fiegel vissi þó ekki af því. Hann var enn í bænum Chester og enn að slást á pöbbum.
Segar lést úr hvítblæði árið 1938, þá aðeins 43 ára gamall. Fiegel var þó enn hinn hraustasti, þá 69 ára. Það var eftir andlát Segar sem Fiegel kynntist Stjána bláa. Hann lést svo sjálfur árið 1947 og var lagður til hvíldar í ómerktri gröf. Gröfin var ómerkt allt þar til aðdáendaklúbbur Stjána bláa reisti þar legstein.
