Lögreglumaðurinn Mervin Mayo bræddi hjörtu þegar hann söng ástarsöng til eiginkonu sinnar á sviðinu í hæfileikakeppninni America’s Got Talent. Dómararnir heilluðust af flutningnum en þó meira af sjálfum manninum og ástinni sem hann ber til konu sinnar.
„En rómantískt, það er svo fallegt hvernig þú elskar hana og ég held að fólk muni elska þig,“ sagði leikkonan Sofia Vergara sem er í dómnefndinni. Harðjaxlinn Simon Cowell, sem vanalega er sá dómari sem erfiðast er að hreyfa við sagði: „Þú ert í alvörunni með góða rödd og allt sem þú gerðir var einlægt. Ég hugsa að þetta hafi verið frábær stund og að fólk eigi eftir að heillast af þér.“
Mervin starfar sem lögreglumaður í Richmond í Virginíu. Hann vinnur helst með ungmennum í áhættuhópum.
„Ég hef starfað sem lögreglumaður í 19 ár. Ég er ekki bara venjuleg götulögga. Ég er lögreglumaður sem starfa með grunnskólunum þar sem ég vinn með unglingum sem hafa sýnt áhættuhegðun og reyni að koma í veg fyrir að þau leiðist út í glæpi.“
Það er engin tilviljun að Mervin valdi sér þessa sérhæfingu. Hann var sjálfur vandræðaunglingur og ólst upp við fátækt í félagslegu húsnæði. Þar var starfrækt forvarnarverkefni sem átti eftir að breyta lífi hans. Lögreglumaður tók hann undir væng sinn og héld honum á beinu brautinni. „Ég er lifandi í dag því hann hélt mér á beinu brautinni og ég er svo þakklátur því eins og ég segi fólki þá sá ég fleiri morð sem barn heldur en ég hef séð sem lögreglumaður. “
Eiginkona hans Michelle er forstöðumaður námsráðgjafar í umdæminu og starfar náið með manni sínum. Hann segir eiginkonu sína hafa hvatt sig til að taka þátt í America’s Got Talent.
„Það er konu minni að þakka að ég er hérna í dag. Hún hvetur mig til að láta drauma mína rætast.“
Mervin söng lagið Thinking Out Loud eftir Ed Sheeran. Á meðan hann söng gjóaði hann ítrekað augunum til konu sinnar og að flutningi loknum fékk hann fingurkoss frá henni að launum.
Dómararnir heimtuðu að Michelle kæmi upp á svið með honum. „Þið eruð bæði frábær. Þið eruð fólkið sem gerir að verkum að við erum örugg og eins fólki í skólakerfinu. Þið sinnið samfélagslegri þjónustu og það er æði,“ sagði dómarinn Howie Mandel og bætti við að hann hlakkar til að sjá þau aftur.
Mervin fékk einróma já frá dómnefnd og mun því halda áfram á næsta stig keppninnar.
