Ungfrú Ísland 2024 verður valin þann 14.ágúst n.k. Lilja Sif Pétursdóttir, Ungfrú Ísland 2023, mun krýna arftaka sinn, en Lilja keppti fyrir Íslands hönd í keppninni Miss Universe í El Salvador í fyrra.
Keppnin fer fram í Gamla Bíó og verður í beinni útsendingu á Vísi og Stöð2Vísi.
Miklar breytingar munu verða á keppninni í ár en þar ber hæst að keppnin verður alfarið á íslensku og alíslensk dómnefnd mun velja þá konu sem ber sigur úr bítum.
Dómnefndina í ár skipa:
Friðrik Ómar Hjörleifsson, tónlistarmaður.
Arna Ýr Jónsdóttir, fegurðardrottning og hjúkrunarfræðinemi.
Guðmundur Birkir Pálmason, kírópraktor og áhrifavaldur.
Gerður Huld Arinbjarnardóttir, viðskiptakona.
Kolbrún Pálína Helgadóttir, athafnakona.
Það er augljóst að dómnefndinni bíður ekki auðvelt verkefni því 25 glæsilegar og frambærilega konur keppa um titilinn og tækifærið sem fulltrúi Íslands á alþjóðavísu.
Stærsti og veigamesti hluti keppninnar er viðtalshlutinn, en keppendur hitta dómnefnd í persónulegu viðtali daginn fyrir lokakvöldið. Á sviðinu sjálfu munu konurnarnr svo klæðast fatnaði frá Gina Tricot, sundfötum frá Wagtail og skarti frá Vera Design – og að lokum koma fram í síðkjól sem þær hafa valið sjálfar.
„Ég er virkilega spennt fyrir þessum breytingum. Það skiptir mig höfuðmáli að allir keppendur standi jafnir og ég er sannfærð um að þessi fjölbreytti hópur fagfólks velji okkur góðan fulltrúa.” segir Manuela Ósk Harðardóttir, framkvæmdarstjóri Ungfrú Ísland.
Almenningi gefst einnig tækifæri til að velja NETSTÚLKUNA 2024. Hægt er að kjósa hér.
