Fjölmiðlamaðurinn Logi Bergmann Eiðsson, sem starfað hefur hjá Samtökum fyrirtækja í sjávarútvegi undanfarna átján mánuði, greinir frá því að hann varð fyrir óborganlegum vinnustaðahrekk á dögunum. Eins og lesendur DV hafa ef til vill orðið varir við þá hafa töskur með andliti Loga Bergmanns dúkkað upp á samfélagsmiðlum og vakið nokkra athygli.
Sjá einnig:Fleiri Loga töskur dúkka upp – „Hvað er í gangi?“
Margir klóruðu sér í höfðinu yfir því hvað væri eiginlega í gangi en hið sanna kom í ljós þegar að Logi Bergmann mætti í heimsókn á vinnustaðinn sinn í dag, en hann undirbýr nú flutning til Bandaríkjanna þar sem eiginkona hans, Svanhildur Hólm Valsdóttir, tekur brátt við stöðu sendiherra Íslands vestra. Á miðju gólfi stendur taskan sem dúkkað hefur upp á á samfélagsmiðlum undanfarin misseri en á færslu hins annálaða hrekkjalóms má sjá að hann er stoltur af lærisveinum sínum.
„Tekinn! Síðasta hálfa annað árið hef ég unnið hjá SFS og skemmt mér mjög vel. Skemmtileg vinna og frábærir vinnufélagar. Eins og gengur hef ég aðeins verið að hrekkja þau og reynt að kenna þeim vísindin á bak við góða hrekki. Svo kom að því. Ég kominn í sumarfrí , að undirbúa brottför til Bandaríkjanna, og það fara að birtast á Facebook myndir af furðulegum töskum út um allan bæ. Meira að segja fréttir í fjölmiðlum. Ég er náttúrlega mjög hógvær maður þannig að ég gerði ekki ráð fyrir að töskur með þessari ágætu mynd væru fjöldaframleiddar.
Svo fer ég í heimsókn til vina minna í vinnunni og hvað er þar á miðju gólfi annað en þessi helvítis taska! Þau pöntuðu þetta sem kveðjugjöf og ákváðu að búa til skemmtilegan hrekk.
Mér líður eins og kennara sem er stoltur af nemendum sínum. Í mörg ár hef ég haldið fyrirlestra um hrekki á vinnustöðum og þessi verður í næsta fyrirlestri! Það var mikil vinna á bak við þetta, miklar pælingar og í því felst væntumþykja sem ég kann að meta. Stundum er nefnilega fínt að vera tekinn,“ skrifar Logi Bergmann kátur.
