Það er aldrei lognmolla í kringum rapparann Kanye West sem nýlega ákvað að snúa sér að klámi og nota til þess vörumerkið sitt, Yeezy. Yeezy hefur til þessa verið þekktast fyrir framleiðslu á strigaskóm og því kom það illa við starfsmenn, sem eru þó nokkrir undir lögaldri, þegar eiginkona West, Bianca Censori, sendi starfsmanni póst með vefslóð sem vísaði á frekar klámfengið myndefni.

Klámefni þetta, sem og annað efni sem stóð til að bjóða uppá hjá klámforritinu Yeezy Porn, var aðgengilegt starfsfólki sem ekki hafði aldur til að skoða það. Þessu er í það minnsta haldið fram í stefnu sem hefur verið lögð fram gegn fyrirtækinu.

Því er haldið fram í stefnu að vinnustaðamenningin hjá streymisveitu West, YZYVSN hafi verið eitrað. Þegar ákveðið var að hefja framleiðslu á klámi hafi ekkert verið gert til að tryggja að ólögráða starfsmenn fyrirtækisins kæmu ekki nálægt framleiðslunni. Þvert á móti hafi þessir starfsmenn í sumum tilvikum neyðst til að horfa á klám starfa sinna vegna.

Lögráða starfsmenn hafi þó líka fengið að finna fyrir því en í stefnu er vinnuaðstæðum líkt við þrælahald. Starfsmenn hafi mátt sæta ómannúðlegri framkomu. Fyrrum mannauðsstjóri fyrirtækisins. Milo Yiannopoulos hafi jafnvel kallað starfsmenn, „nýja þræla“.

Á bak við stefnuna eru margir fyrrum starfsmenn streymisveitunnar YZYVSN. Veitan var stofnuð til að keppa við Spotify, Apple Music og Tidal og til að kynna plötur Kanye West, Vultures og Vultures 2. Stefnendur segja að West og Yiannopoulos hafi ráðið til sín alþjóðlegt hugbúnaðarteymi sem samanstóð af mjög ungum forriturum, sá yngsti aðeins 14 ára. Þessu teymi voru lofaðir gull og grænir skógar ef það kláraði forritið, samþykkti vinnuaðstæður og allt þetta án þess að kvarta. Síðan var þeim gert að skrifa undir þagnareið og ólögráða starfsmönnum gert að skrifa undir yfirlýsingu um að þeir væru aðeins sjálfboðaliðar, svo aldurinn færi ekki að vekja spurningar hjá eftirlitsaðilum.

Eftir þetta hafi teymið þurft að sæta stöðugu áreiti frá yfirmönnum og urðu fyrir kynþáttaníði og gert að vinna við eitraðar aðstæður. Teymið var áreitt á grundvelli aldurs, kynþáttar, kyns, kynhneigðar og uppruna. Sumir voru uppnefndir þrælar og vinnustaðnum skipt niður eftir húðlit. Þeir sem voru dekkri fengu verri verkefni.

Starfsmönnum var gert að vinna fram á nótt án þess að fá greitt fyrir það yfirvinnu og án þess að fá greiðslur fyrir að missa af lögbundnum hvíldartíma. Ef starfsmenn kvörtuðu var þeim hótað að launum þeirra yrði haldið eftir.

Svo þegar forritið var tilbúið og komið að skuldadögum þá stóð West ekki við sitt. Því er teymið að krefjast vangreiddra launa, yfirvinnu og miskabóta út af þeirri meðferð sem þeir voru látnir sæta.

Yiannopoulos kallar stefnuna brandara í færslu á samfélagsmiðlinum X. Höfuðpaurinn að baki stefnunni sé ósáttur við að hafa ekki verði boðin full vinna hjá Yeezy. Það megi rekja til þess að sá sé óhæfur. Nú ætli hann þó að stefna fyrirtækinu til að hafa það að féþúfu.

„Þetta er óheiðarlegasta stefna sem ég hef séð, og hef ég unnið fyrir milljarðamæringa og stórstjörnur í heilan áratug.“