Maðurinn sagði sögu sína á Reddit en forsaga málsins er sú að eiginkonan, sem hann er búinn að vera giftur í tíu ár, var að fara í „vinkonuferð“ fyrir skemmstu.
Daily Star segir frá þessu.
Maðurinn ákvað að taka heimilið í gegn á meðan eiginkonan skemmti sér með vinkonum sínum en honum brá heldur betur í brún þegar hann fór í fataskáp eiginkonunnar til að ganga frá fötum af henni. Þar fann hann kassa sem meðal annars innihélt farsíma, bréf og ljósmyndir af eiginkonu hans með öðrum manni.
„Þetta voru ástarbréf en þau voru ekki frá mér. Þau voru frá einhverjum sem kallaði sig „A“. Myndirnar voru af eiginkonu minni og öðrum manni og farsíminn var fullur af smáskilaboðum á milli hennar og „A“. Ég las nógu langt til að komast að því að þessi samskipti höfðu staðið yfir í að minnsta kosti sex mánuði,“ sagði maðurinn og bætti við að konan hans hefði hitt manninn meðan hann var í vinnu og þegar hún sagðist ætla að hitta vinkonur sínar.
Maðurinn segist hafa rætt málin við eiginkonuna þegar hún kom heim og er skemmst frá því að segja að hún þrætti ekki fyrir að hafa haldið fram hjá. Hún kvaðst þó vera full eftirsjár og sagði að „þetta hefði bara gerst“.
„Hún er hjá vinkonu sinni núna og ég er hér í tómu húsi, að reyna að skilja þetta allt saman. Partur af mér vill fyrirgefa henni en annar partur öskrar á mig að ég muni aldrei geta treyst henni aftur.“ Leitaði maðurinn ráða um hvað væri best að gera í þessari erfiðu og leiðinlegu stöðu.
Margir hafa lagt orð í belg undir færslu mannsins og benda sumir á að hún hafi bara játað framhjáhaldið af því að það komst upp um hana. Hún hefði að líkindum haldið því áfram ef hann hefði ekki fundið kassann og innihald hans. Það eina rétta í stöðunni sé að sækja um skilnað og halda áfram með lífið.