Bandaríska leikkonan Tori Spelling, sem er hvað þekktust fyrir hlutverk sitt í geysivinsælu þáttunum Beverly Hills 90210, segir að hún hafi gengist undir brjóstastækkun á frekar vafasömum stað þegar hún var aðeins nítján ára gömul.

Hún sagði frá þessu í hlaðvarpsþætti sínum misSpelling.

„Þetta var í fyrsta sinn sem ég fór í brjóstastækkun. Þáverandi vinkona mín… þetta var þessi vondi kærasti sem ég tala stundum um, þetta var kærasta vinar hans, og hún var alveg: „Ó, þú þarft bara að fara þangað.“ Ég fór til læknisins sem hún benti mér á og stofan hans var í verslunarkjarna. Ég er ekki að djóka. Ég held hann hafi verið ágætis læknir, en þetta var skurðstofa í verslunarkjarna. Ég var nítján ára […] og mjög ringluð,“ sagði hún.

„Auðvitað sagði ég ekki neitt. Ég gekkst undir aðgerðina og vinir mínir fóru með mig heim. Á þessum tíma voru Alicia Silverstone og Carmen Electra bestu vinkonur mínar og þær sáu um mig. Ég gæti ekki skáldað þetta.“

Leikkonan sagði að hún hafi á endanum þurft að gangast undir aðra brjóstaaðgerð.

„Ég fór aftur í brjóstaaðgerð en þá lét ég minnka þau. Þegar ég skoða myndir af mér frá tíunda áratugnum þá finnst mér brjóstin mín flott. Ég vildi óska þess að ég hafi ekki fengið mér brjóstapúða. Ég var í stærð 32B eða jafnvel A+. Ég vildi bara aðeins meiri fyllingu.“