Undanfarin ár hefur hann mætt á tónlistarhátíðina Copenhell í júní og var árið í ár engin undantekning.
Matthías tók skemmtilegar stemningsmyndir, myndir af Íslendingum á svæðinu og auðvitað líka myndir af hljómsveitum. Hann ræddi einnig við Sólrúnu Tinnu Eggertsdóttur, sem var á hátíðinni með bás fyrir Hamborgarabúllu Tómasar.
„Við vorum að klára fjórða árið okkar á Copenhell. Byrjuðum 2019 og höfum verið með síðan,“ segir Sólrún.
Þetta er stórt batterí og krefst mikils skipulags.
„Það tekur góðan tíma að skipuleggja svona stóra hátíð, með 40 þúsund gesti og fjögurra daga sölu frá 12.00 til 02.00 alla dagana,“ segir hún.
„Við byrjum strax í janúar að skipuleggja sama ár, erum komin með góða reynslu og langan tékklista en alltaf er þetta jafn mikil vinna.“
„Við hönnum einnig Copenhell boli á hverju ári með Tommi’s Burger Joint lógó í lógó þess bands sem er að spila það árið. Við völdum Limp Bizkit lógóið í ár, enda var það klárlega besta bandið að mínu mati ásamt Fu Manchu,“ segir Sólrún.
„Það er rosalega góð stemmning á Copenhell, og er hátíðin eins og sérsniðin fyrir okkur. Fólk á besta aldri og allir svo jákvæðir og hressir þó svo að flest fólk sé vígalega klætt. Fáum mikið af hrósi og mikið af Íslendingum koma við og fá sér góðan hamborgara,“ segir hún og heldur áfram.“
„Copenhell er frábær tónlistarhátíð, rokkið getur verið svo allskonar og alltaf góð bönd sem maður fær að upplifa ásamt því að selja rosalega mikið af hamborgurum.“
Skoðaðu myndaveisluna frá hátíðinni hér að neðan.