Lögregla rannsakar andlát leikarans Matthew Perry sem fannst látinn í heitum potti við heimili sitt í október. Fyrst var talið að leikarinn hefði látist af slysförum en samkvæmt krufningu sem var opinberuð í desember lést hann sökum ofskömmtunar af lyfinu ketamíni sem leiddi til eitrunaráhrifa og loks drukknunar. Lögregla hóf í kjölfarið rannsókn á andlátinu, meðal annars til að leiða í ljós hvaðan leikarinn fékk lyfið.
People greinir nú frá því að rannsóknin sé á lokastigum og það sé mat lögreglu að fjöldi einstaklinga eigi sök í málinu. Það er svo undir ákæruvaldinu komið hvort að þessir einstaklingar verði dregnir til ábyrgðar eða ekki.
Leikarinn hafði áratugum saman glímt við fíknisjúkdóm og var að gangast lyfjameðferð með ketamíni áður en hann lést. Ketamín er notað til að meðhöndla bæði verki og þunglyndi í litlum skömmtum, en leikarinn hafði leitað til meðferðarstofnunar í Sviss á meðan á faraldri Covid stóð. Ljóst er þó að sá skammtur sem dró hann til dauða var langt umfram meðferðarskammt og er því talið að leikarinn hafi orðið sér úti um lyfið með ólögmætum hætti.