Christopher Brosnan, sonur leikarans Pierce Brosnan, lét sjá sig á almannafæri á dögunum, sem var afar sjaldséð sjón þar sem hann heldur sig að mestu úr sviðsljósinu.

Það eru tæplega tuttugu ár liðin síðan faðir hans lokaði á hann vegna fíknivanda hans.

Christopher, 51 árs, starfaði sem aðstoðarleikstjóri við kvikmyndir föður síns: Tomorrow Never Dies (1997), The World Is Not Enough (1999) og Robinson Crusoe (1997).

Paparazzi ljósmyndari náði myndum af Christopher í erindagjörðum í London. Page Six birti myndirnar.

Pierce Brosnan’s son Christopher makes rare public outing nearly 20 years after actor ‘cut him off’ over addiction https://t.co/NvwMZRlP3h pic.twitter.com/5H56R5FY8u

— Page Six (@PageSix) June 21, 2024

Blóðforeldrar Christopher eru fyrsta eiginkona Pierce, Cassandra Harris, og fyrrverandi eiginmaður hennar, Dermot Harris.

Pierce, 71 árs, ættleiddi bæði Christopher og systur hans, Charlotte Brosnan, árið 1986 þegar Dermot féll frá.

Cassandra lét lífið eftir baráttu við krabbamein árið 1991. Þau eignuðust soninn Sean Brosnan, 40 ára, saman.

Pierce giftist síðan núverandi eiginkonu sinni, Keely Shaye Brosnan, árið 2001. Þau eignuðust tvo syni, Dylan Brosnan, 27 ára, og Paris Brosnan, 23 ára.

Opnaði sig um vanda sonar síns

Christopher hefur lengi glímt við fíknivanda og oft komist í kast við lögin. Pierce lokaði þess vegna á hann fyrir tveimur áratugum.

„Christopher er ennþá mjög týndur. Því miður. Ég veit hvar hann er en líf hans er mjög erfitt,“ sagði leikarinn við Playboy tímaritið árið 2005.

„Ég get bara haldið í vonina að hann muni ná bata. Hann er búinn að láta alla í fjölskyldunni ganga í gegnum þrekraun en enginn hefur haft það jafn erfitt og hann. Hann veit hvernig hann á að komast út úr þessu en hann vill það ekki.“

Pierce sagði að þetta væri sársaukafullt. „Þú getur aldrei alveg lokað á þau, en ég hef lokað á Christopher.“