Eins og varla fór framhjá nokkrum manni var poppstjarnan Justin Timberlake handtekinn í síðustu viku fyrir akstur undir áhrifum í bænum Sag Harbor í Hamptons í New York-fylki. Nú hefur það komið upp á yfirborðið að lögreglumaðurinn sem handtók Timberlake stöðvaði för hans nokkru fyrr og gaf honum sjéns. Lögreglumaðurinn, sem heitir Michael Arkinson, þekkti ekki poppstjörnuna en hann sagði Timberlake að hann væri undir áhrifum og ætti ekki að keyra þegar stjarnan var sest undir stýri skammt frá hótelinu þar sem hann sat að sumbli fyrr um nóttina.

Hélt Arkinson þar með að afskiptum sínum að málinu væri lokað og að maðurinn myndi taka leigubíl heim en það reyndist öðru nær. Stuttu síðar sá Arkinson bíl Timberlake á ferð um Hamptons og þá var ekkert í stöðunni annað en að handtaka Timberlake.

„Þvílíkur heimskingi,“ hefur New York Post eftir ónefndum heimildarmanni í umfjöllun sinni um málið.