Á laugardaginn kviknaði eldur í þaki Kringlunnar og kom verslunin Gallerí 17 verst út úr brunanum. Gallerí 17 er ein af verslunum NTC og sagði Svava að „þetta var bara eins og hryðjuverk, þetta var skelfilegt. Það var allt í reyk og maður gat ekki séð s vona tvo metra fyrir framan sig“ þegar hún lýsti aðkomunni á laugardaginn í viðtali hjá Vísi.
Orðanotkun hennar vakti mikla reiði en Vísir birti viðtalið með fyrirsögninni: „Þetta var bara eins og hryðjuverk.“
Sjá einnig: Orðanotkun Svövu í 17 vekur úlfúð
DV fjallaði um gagnrýnina í gær en í kjölfarið rigndi stuðningskveðjum yfir Svövu á Facebook-síðu DV.
„Fólk ætti að reyna setja sig í spor búðareigenda sem koma að búðinni sinni ónýtri eftir reyk og vatn og samhryggjast með því frekar en að snúa út úr orðum þess á meðan það er í áfalli. Skammist ykkar,“ skrifaði Ingimar Skúli Sævarsson, leiðsögumaður.
„Ég segi stundum: „Íbúðin mín lítur út fyrir að hafa lent í sprengjuárás.“ Kommon, róa sig í dómhörkunni kæra fólk. Verum frekar þakklát fyrir að eiga svona duglegt og flott fólk. Svava er mögnuð kona og veit vel muninn á þessu orði sem hún grípur til í sinni geðshræringu og alvöru hörmungum,“ sagði ein kona.
„Vá, hvað fólk er orðið óhugnarlega leiðinlegt sparðatíninga smáatriða óþolandi. Að pikka upp orð hennar um aðkomu búðarinnar og blása upp í rjáfur af stórhneykslun er dæmi um aðila sem sér allt i gegnum skráargat,“ sagði önnur og hafa 38 manns líkað við þá athugasemd.
„Og hvað, ég segi nú stundum að húsið mitt líti út eins og eftir kjarnorkusprengju,“ sagði einn netverji og tóku margir undir.
Sumir bentu á að Svava hafi skiljanlega verið í áfalli þegar viðtalið var tekið.
„Vá, hvað fólk er að kvarta bara til að kvarta og finnur þá eitthvað. Bara mjög eðlilegt að segja og fólk er í sjokki þegar tekið er viðtal við það. Reynið frekar að setja ykkur í þeirra spor. Ást og friður fólk,“ sagði annar netverji.
Margir sendu Svövu hlýjar kveðjur. „Konan er skiljanlega í sjokki. Þetta hlýtur að vera hræðileg lífsreynsla og hún á alla mína samúð.“
„Æi, fólk getur sagt alls konar og sumt óheppilegt þegar það er í sjokki. Það er auðvitað áfall að lenda í svona og aðkoman gæti hafa líkst hryðjuverkaásrás, ekki veit ég það. En auðvitað er hryðjuverkaárás hryllingur þar sem yfirleitt er manntjón og hörmungar sem eiga sér stað, af mannavöldum og með ásetningi. En plís, ekki dæma fólk í drasl fyrir það sem það segir undir álagi í örstuttu fjölmiðlaviðtali.“
