Ekki er allt sem sýnist. Þetta orðatiltæki átti heldur betur eftir að sanna sig á ferðalagi konu til Ítalíu. Hún ætlaði að njóta sín í fríinu og bókaði því sérstaklega herbergi á gistiheimili nokkru sem var auglýst með sjávarútsýni. Vissulega var útsýnið til staðar, en þó ekki með þeim hætti sem hún reiknaði með.

Clarisa Murgia frá Argentínu deildi raunum sínum á TikTok en mál hennar þykir stórkostlega fyndið. „Ég er illa svikin krakkar,“ sagði unga konan í myndbandi þar sem hún sýndi sjávarútsýnið sem hún hafði borgað aukalega fyrir. Hún sagði þetta dæmi um þar sem væntingar og raunveruleiki fer ekki saman. Á myndbandinu má sjá hana og ferðafélaga njóta sjávarútsýnisins, friðsæll sjórinn og blár himinn. En það er kannski ekki furða að útsýnið hafi verið friðsælt, því þetta var ekki sjórinn heldur veggurinn að byggingunni við hliðina. Útsýnið reyndist plakat.

„Enginn hefur blekkt mig með þessum hætti áður,“ sagði áhrifavaldurinn hlæjandi í myndskeiðinu. Netverjar hlógu með henni í athugasemdum. Vissulega væri leiðinlegt að útsýnið mætti ekki væntingum en þetta væri engu að síður fyndið. Einn benti meira að segja á að tæknilega væri ekki um blekkingar að ræða. Hún bað um útsýni yfir sjó, og útsýnið fékk hún. Henni var nær að taka ekki fram að hún ætlaðist til þess að fá útsýni yfir alvöru sjóinn.