Körfuboltagoðsögninni Charles Barkley fannst ekki mikið koma til sólmyrkvans á mánudag. Eða þá heldur að fólk væri að leggja það á sig að horfa til himins til að fylgjast með þessu. Þvert á móti fannst honum það vera aular sem það gerðu.
„Voruð þið einhverjir af þessum aulum sem sem stóðu úti og störðuð á þetta í dag?“ spurði Barkley í útsendingu á úrslitaleik bandaríska háskólakörfuknattsleik á milli Uconn og Illinois háskólanna.
Samlýsandi Barkley, Ernie Johnson, neitaði því en Barkley hélt áfram eins og Fox News sjónvarpsstöðin greinir frá.
„Jú víst. Hei, við höfum öll séð myrkur. Hættið þessu!,“ sagði Barkley sem gerði garðinn frægan í NBA deildinni á síðustu öld með Philadelphia 76ers og Phoenix Suns. „Ég ætla ekki að sitja úti eins og hálfviti og bíða eftir myrkrinu. Það verður komið myrkur þegar við förum út í kvöld.“
Hér á Íslandi var deildarmyrkvi en í Bandaríkjunum, Mexíkó og Kanada gátu tugmilljónir séð almyrkva. Fólk keypti sér sólmyrkvagleraugu í stórum stíl og margir hópuðust saman eða héldu veislur. Almyrkvi verður sýnilegur á Íslandi 12. ágúst árið 2026.
