Hjónin Katrín Bjarkadóttir og Stefán John Stefánsson eru helstu draugasérfræðingar Íslands. Þau halda úti hlaðvarpinu vinsæla Draugasögur og ferðast með hlustendur um myrkustu kima heimsins. Þau hafa um árabil rannsakað draugagang með ýmsum tækjum og segjast hafa undir höndum fjölda sönnunargagna um merki að handan.

Þau hjálpa einnig einstaklingum sem á þurfa að halda, án endurgjalds, að losna við draugagang og segja það oftast auðvelt þar sem draugar séu venjulega meinlausir. Hins vegar hafa komið upp tilfelli segja þau, þar sem draugar hafa beitt fólk ofbeldi og þá þurfa þau að grípa inn í.

Þau ræða eitt atvik sérstaklega í spilaranum hér að neðan. Brotið er hluti af nýjasta þætti af Fókus sem má horfa á í heild sinni hér.

Katrín og Stefán segja að yfirleitt sé auðvelt að fæla drauga burt en málið er heldur alvarlegra þegar draugarnir eru farnir að beita ofbeldi.

„Oft er þetta mjög basic sem fólk þarf að gera. Það er bara að hreinsa og sage-a og vera ákveðið. En þegar kemur að ofbeldi og börnum þá ristir það svolítið og þá þurfum við að skoða það nánar,“ segir Stefán.

„Það var eitt mál þar sem það var alltaf verið að ráðast á ósköp venjulegan miðaldra mann, sem trúði sjálfur ekkert á drauga. En í hvert skipti sem hann fór inn í bílskúrinn sinn að vinna eða gera eitthvað, þá var bara verið að kasta hlutum í hann. Hann virkilega slasaðist mjög illa, mjög illa. Hann þurfti að fara upp á spítala,“ segir Katrín.

„Þetta er svo venjulegur maður, bara maður sem pældi aldrei í þessu en hann hafði enga útskýringu á því sem var í gangi. Eina ástæðan fyrir því að við komum inn í málið var vegna þess að dóttir hans vissi hver við erum. Þannig það er kannski svona týpískt mál um eitthvað sem er ofboðslega erfitt að kljást við.“

Þau segja erfiðast þegar börn verða fyrir ofbeldi. „Svo eru það börnin, það er oftast ef þau eru alveg hryllilega hrædd. Það er rosa mikil ásókn á þau og þau geta ekki sofið, foreldrarnir örmagna,“ segir hún.

„Þá kíkjum við og tökum stöðuna,“ segir Stefán.

„En það fallega við þetta samt er að þetta er oftast ágætlega auðvelt að tækla börnin. Við erum með ákveðið prógramm. Við eigum litla töfrasprota, við erum að fara á þeirra level og oftast virkar það og bara hættir,“ segir Katrín.

Þau ræða þetta nánar í spilaranum hér að ofan. Brotið er hluti af nýjasta þætti af Fókus sem má horfa á hér, þú getur einnig hlustað á Spotify.