Harry Bretaprins flaug í gær frá heimili sínu í Kaliforníu til fundar við föður sinn, Karl III Bretakonung, í London. Harry kom til Clarence House klukkan 14.45 til fundar við föður sinn, nokkrum klukkustundum eftir að hann lenti á Heathrow flugvelli og stóð fundurinn yfir í 45 mínútur, en feðgarnir hafa lítið talast við eftir að Elísabet drottning lést og töluðust sem dæmi ekki við þegar Harry varð 39 ára í september. Karl, sem greindist með krabbamein fyrir stuttu síðan, lét þó syni sína persónulega vita af greiningu hans, áður en opinber tilkynning kom frá Buckinghamhöll.
Eftir fund þeirra feðga gisti Harry síðan á lúxushóteli enda hálfheimilislaus í Bretlandi eftir að hann og eiginkona hans sögðu sig frá öllum konunglegum skyldum og þurftu að skila Frogmore Cottage á síðasta ári. Síðast flaug prinsinn til Bretlands í september, fyrir Well Child verðlaunin, og gisti þá líka á hóteli. Hitti hann fjölskyldu sína ekki í þeirri ferð og mun hann þá hafa óskað eftir að dvelja í Windsor-kastala en þeirri beiðni var hafnað.
Heimildamaður nákominn Harry sagði að hann hefði strax ákveðið að koma til Bretlands til að vera við hlið föður síns. Sérfræðingar hafa haldið því fram að það að Harry hafi brugðist svona hratt við bendi til þess að ástand konungs sé alvarlegt.
Breskir miðlar greina frá því að Harry hefði gjarnað viljað hitta bróður sinn Vilhjálm, en ólíklegt er að svo verði, allavega í þessari ferð. Vilhjálmur hefur að mestu tekið sér frí frá opinberum skyldum til að sinna eiginkonu sinni Katrínu síðustu daga, en hún er að jafna sig eftir kviðarholsaðgerð og tekur sér langt leyfi frá opinberum störfum þar til eftir páska. Vilhjálmur mun þó sinna konunglegum skyldum í kvöld í árlegum góðgerðarkvöldverði.
Búist er við að Harry fljúgi fljótlega aftur til síns heima, en í næstu viku mæta þau hjónin á viðburð í Kanada í tilefni þess að ár er til Invictus leikanna í Vancouver og Whistler.
Það hefur lengi andað köldu milli bræðranna Harry og Vilhjálms en heimildamaður greinir DailyMail frá því að sameiginlegur vinur þeirra, Mark Dyer, sem var leiðbeinandi prinsanna eftir dauða móður þeirra Díönu, gæti hjálpað þeim til að bæta sambandið. Hefur Dyer sýnt Harry mikinn stuðning síðustu ár. Heimildamenn nákomnir Harry segja að aðalástæða ferðarinnar til Bretlands hafi verið að hitta Karl föður hans, en ef tækifæri gæfist til að hitta Vilhjálm þá myndi Harry þiggja það.
Sérfræðingar hafa sagt að þeir voni að ferð Harry sé tákn um vopnahlé hjá bræðrunum og Karli föður þeirra og að veikindi konungs geti þannig haft eitthvað jákvætt í för með sér. Í bók hans, Spare, sem kom út í fyrra greindi Harry frá því að Karl hefði sagt við syni sína: „Strákar, vinsamlega ekki gera síðustu ár mín erfið.“
Kristina Kyriacou, fyrrverandi fjölmiðlafulltrúi konungsins, segir um samband þeirra feðga: „Karl dýrkar Harry og þetta sambandsleysi var ekki eitthvað sem hann óskaði sér. Ef að eitthvað jákvætt kemur út frá þessu erfiða ástandi og Harry og bróðir hans og konungshjónin sameinast á ný, hversu yndislegt.“
Karl konungur hefur þegar hafið krabbameinsferð á göngudeild, eftir að hafa greinst með krabbamein í kjölfar aðgerðar vegna stækkandi blöðruhálskirtils. Mun hann vera jákvæður yfir veikindum sínum. Búist er við að hann verði frá konunglegum skyldustörfum í einhverja mánuði.
