Færri Bandaríkjamenn eru að mæta í ræktina árið 2024 miðað við síðustu ár og þjálfarar segja vinsælt megrunarlyf eiga sök.

Ozempic var þróað sem lyf í baráttu gegn sykursýki en hefur reynst byltingarkennt sem megrunarlyf.

Sjá einnig: Lýtalæknar græða á aukaverkun vinsæla megrunarlyfsins – Þetta er „Ozempic andlitið“

Ýmsar aukaverkanir geta fylgt notkun lyfsins, eins og ógleði. „Ég hef séð nokkuð marga skjólstæðinga, bæði nýja og reyndari, kasta upp á æfingu vegna lyfjanna, því þeim er svo flökurt og svimar,“ sagði einkaþjálfarinn Salim Javed við The Post.

Í umfjöllun The Post er rætt við 28 ára konu sem viðurkenndi að hafa kastað upp tvisvar sinnum í ræktinni eftir að hafa byrjað á Ozempic.

„Sem betur fer náði ég í ruslafötuna,“ sagði hún.

Í bæði skiptin var hún að gera æfingar sem hún hafði gert oft áður, áður en hún byrjaði á Ozempic.

Vilja frekar léttast en að byggja upp styrk

Þetta gæti hugsanlega útskýrt af hverju aðsókn í líkamsræktir hafa farið dvínandi í Bandaríkjunum.

„Þetta er fyrsta árið sem ég sé fólk hætta að æfa í janúar. Skjólstæðingar vilja frekar léttast heldur en að byggja upp vöðvamassa eða hugsa um heilsuna í heild sinni,“ sagði Javed.

„Það eru tveir hópar, fólkið sem byrjar á Ozempic til að hefja þyngdartapsvegferð sína og svo er það fólkið sem missir allan metnað til að æfa þegar það byrjar á lyfinu. Ég var vön að sjá suma í ræktinni í þrjá tíma á dag, en nú eru þeir byrjaðir á Ozempic og hættir að mæta,“ sagði einkaþjálfarinn Makena Diehl við The Post.

Á milli ára hafa hlutabréf í líkamsræktarstöðvum og tækjum í Bandaríkjunum lækkað. Hlutabréf Planet Fitness hafa lækkað um 15 prósent, Xponential hafa lækkað um 58 prósent, Nautilius hafa fallið um 78 prósent og Peleton hafa fallið um 66 prósent.

Eina líkamsræktarkeðjan sem hefur farið upp milli ára er Equinox. Hugsanlega er hægt að tengja það við nýtt prógram sem stöðvarnar bjóða upp á sem er sérstaklega ætlað fólki sem hefur misst mikla þyngd á megrunarlyfjum eins og Ozempic, Wegovy og Mounjaro. Samkvæmt talsmanni Equinox hefur aðsókn aukist um 12 prósent milli ára.

Konan sem ældi í ræktinni mætir enn. „Ég veit bara núna að ég get ekki borðað fyrir æfingu. Ég reyni að æfa fastandi á morgnanna,“ sagði hún.