Gunni Hilmarsson, tónlistarmaður og fatahönnuður, breytti nýlega um nafn og segir ferlið hafa tekið enga stund.

Gunni er landsþekktur fyrir störf hans í tískuheiminum þar sem hann hefur starfað frá unglingsaldri, fyrir stuttu opnaði hann verslunina Thomsen RVK þar sem hann selur karlmannsföt undir eigin merki og von er á kvenfatnaði.

Gunni var skírður Gunnar, en ávallt kallaður Gunni, eins og hann ræðir við Kristínu Sif á K100. 

„Ég er meira en kallaður Gunni. Ég breytti nafninu mínu um daginn og er eini Gunninn á Íslandi,“ sagði Gunni og bætti við að ferlið hefði verið ótrúlega einfalt. „Þetta var á fimmtudagskvöldi klukkan hálf tíu. Ég gúglaði bara: nafnabreyting, fann einhvern hlekk og sótti um. Klukkan 9:15 morguninn eftir fékk ég tölvupóst um að nafnabreytingin væri samþykkt.“ 

Gunni á þó eftir að ganga frá ýmsum atriðum, eins og að uppfæra öll skilríki og halda nafnaveislu. „Ég þarf að gera það, með köku og blöðrum og fá gjafir,“ sagði Gunni glettnislega.

Gunni segir móður sína ekki hafa verið glaða með nafnabreytinguna.

„Það tók mig svolítinn tíma að segja mömmu frá þessu. Hún var ekki glöð því í fjölskyldunni var búið að bíða mjög lengi eftir að skíra strák í höfuðið á afa. Loksins kom „Gunnarinn“ – og ég skemmdi það,“ sagði hann og hló, en bætti við að annar Gunnar, alnafni afa hans, hefði komið á eftir honum í fjölskyldunni.

„Ég er búinn að vera að hugsa um þetta lengi, af því að ég hef alltaf verið kallaður Gunni,“ sagði tónlistarmaðurinn sem segir að eina undantekningin hafi verið þegar mamma hans var að skamma hann.

Gunni er Facebook-hópi sem heitir Gunnarar og segir að nafnabreytingin hafi stofnað aðild hans í hópnum í hættu.

„Þar var haldin atkvæðagreiðsla, og vegna reynslu og fyrri starfa fæ ég að vera áfram inni á grúppunni.“

Hlusta má á viðtalið í heild sinni hér.