Heiðrún hefur áður sagt frá því í viðtali við DV hvernig hún prófaði alla megrunarkúra og töfralausnir sem völ var á í þeirri von að léttast og bæta lífsgæðin. „Það gerðist aldrei neitt almennilega en ég var alltaf að reyna og gera hver mistökin á eftir öðrum,“ sagði Heiðrún.
Heiðrún heldur úti Instagram-síðu þar sem hún deilir ýmsum fróðleik tengdum næringu og heilsu.
Nú styttist í nýtt ár og setja margir sér áramótaheit tengt heilsu og hreyfingu. Margir ætla að taka lífsstílinn í nefið og grennast hratt. Það er samt gott að hafa nokkra hluti í huga og fer Heiðrún yfir heilbrigt mataræði í ljósi allra kúranna sem njóta mikilla vinsælda í dag. Hún segir þumalputtareglu sína varðandi hollt mataræði vera einfalda en umdeilda. Það eru eflaust margir sem tengja við skrif Heiðrúnar sem hafa reynt að fylgja þessum ótal „reglum“ um það sem má og má ekki. Reglurnar eru eins margar og þær eru misvísandi.
„Borðaðu bara holla fæðu right? Easy!
Samt ekki borða sykur eða korn. Slepptu hveiti og glúteni. Ekki borða of mikið af eggjum út af þessu þarna kólesteroli og ekkert beikon eða ekkert pasta.
Það má ekki drekka gos. Insúlín reset, engar kartöflur. Detoxum. Sleppum öllum kolvetnum og borðum bara fitu svo við komumst í ketosis, verðum sjúklega mjó en ógeðslega andfúl, worth it!
Í útlegð með allar olíur! En notaðu kókosolíu! Slepptu kókosolíunni og fáðu þér avakadó olíu í staðin! Heyrðu ný rannsókn að koma og aftur í fitusnautt! Nei bíddu annars, veldu fitusnauð jógúrt og hentu hnetunum, fita fitar!
En manstu við vorum hætt að borða kolvetni og ávexti og nú erum við bara alltaf svöng og vitum ekki neitt um neitt, snúumst í hringi og endum á að grípa með okkur risa prótein stykki frá þekktum sælgætisframleiðanda en það er í hollustu rekkanum og merkt hátt í próteinum. Hlýtur að vera hollt right? RIGHT?
Teldu hitaeiningar, nei hættu að telja hitaeiningar og teldu macros! RUGL. Borðaðu bara 1200 hitaeiningar á dag, nei annars, sveltu þig! Því Sigga frænka þekkir gaur sem á konu sem á mömmu sem borðaði sko bara 700 hitaeiningar á dag, reykti 2 pakka af filterlausum kamel, hreyfði sig aldrei og var tágrönn alveg þangað til hún hrökk upp af 95 ára gömul. Gerum öll eins og mamma konu vinar Siggu frænku!“
„Misvísandi skilaboð koma úr öllum áttum. Hvert vörumerkið á fætur öðru keppist við að selja okkur heilsulausnir og reyna að sannfæra okkur um að þeirra vara sé sú besta á markaðnum. Og við, litlu sætu lúðarnir, sannfærð um að við séum að fá bestu næringu sem kostur er á þegar raunin er sú að við erum að svelta líkaman okkur um ákveðin næringarefni.
Hættu að skera út kolvetni og fitu. Þú fitnar alveg jafn mikið af kolvetnum, fitu og próteini ef þú borðar of mikið af því. Þú þarft á fitunni að halda. Þú verður að fá kolvetni og prótein er ekki hinn heilagi kaleikur sem gerir þig mjóa/n á einni nóttu.
Það sem virkar er að borða holla fæðu. Fæðu sem þú býrð til heima hjá þér, hentar þér og þínum lífstíl! Fæðu sem er ekki of ólík því sem þú ert að borða í dag.“
Heiðrún segir að svarið sé einfalt.
„Þumalputtareglan mín er einföld, mjög umdeild og klárlega ekki í tísku en hún hljómar svona: Borðaðu mat.
Leyfðu mér að útskýra. Þú grípur með þér pakka af sælgæti. Á pakkanum er innihaldslýsing: „Sykur, mjólk, kakó, gæti innihaldið snefil af hnetum o.s.frv.“
Þetta er ekki matur, þetta er rusl. En svo grípurðu með þér banana, engin innihaldslýsing = matur!
Fiskur = matur
Ferskar 100% kjúklingabringur = matur
Hnetur = matur
Epli = matur
Súkkulaði = Ekki matur, en sjúklega gott og allt í lagi að fá sér einu sinni og einu sinni
Egg = matur
Tilbúnir frosnir réttir = ekki matur
Pizza = ekki matur en í lagi einu sinni og einu sinni
Möndlur = matur
Sérðu hvað ég er að fara? Þú lærir inn á þetta. Það tekur tíma. Pinterest er vinur þinn og þér er alveg óhætt að spyrja mig út í þetta.“
Að lokum segir hún: Reynum að velja óunninn mat í 80% tilfella og leyfum okkur að njóta þess að borða rusl í hin 20%“
Heiðrún ræddi einnig um þetta í Fókus, spjallþætti DV, í október í fyrra. Horfðu á þáttinn í heild sinni hér, eða hlustaðu á hann á Spotify.
