Pistill sem Marta María Jónasdóttir birti á mbl.is um klæðaburð nýju ráðherranna á ríkisráðsfundi á Bessastöðum í gær hefur vakið ólgu. Þar sagði Marta um klæðaburð nýja forsætisráðherrans okkar, Kristrúna Frostadóttur:
„Kristrún klæddi sig upp á í tilefni dagsins og skartaði 144.000 króna kjól úr 100% Viscose. Kjóllinn er frá ítalska tískumerkinu MSGM sem er vandað og vel saumað og býður oftar en ekki upp á klæðileg snið.
Við kjólinn var Kristrún í rauðum skóm og var hárið vel blásið við. Skórnir eru frá íslenska skó- og töskumerkinu Kalda og heita Peki. Það er augljóst að Kristrún er að fá hjálp með fataval því það hefur stórbatnað síðustu mánuði. Hún klæddist til dæmis 54.000 króna pallíettublússu frá Polo Ralph Lauren á kosninganóttinni, sem keypt var í Mathilda í Smáralind, og Smartland greindi frá því að hún hefði neglt sig inn í ríkisstjórn í þessari föngulegu flík.“
Ýmsir netverjar fetta fingur út í þá háttsemi Mörtu að verðleggja klæðnað ráðherranna en það er þó reiðilestur Mörtu um klæðaburð Ingu Sælands, nýs félags- og húsnæðismálaráðherra, sem helst fer fyrir brjóstið á lesendum. Marta skrifar:
„Næsta verk Ingu Sæland er að fá sér stílista. Á meðfylgjandi ljósmyndum sést hún í svörtum skóm sem ná upp að ökkla og er í 40 den sokkabuxum við. Slíkir skór ganga ekki við pils eða kjóla og alls ekki þegar fólk tekur við ráðherraembætti. Þótt það sé napurt á Álftanesi eins og var í gær þá mega slíkar bomsur alls ekki sjást á tröppum Bessastaða. Fólk notar öklaskó við síðbuxur og helst við hversdagslegar athafnir. Betra hefði verið að klæðast hefðbundnum spariskóm með nokkurra sentímetra háum hæl. Skórnir frá Tamaris hefðu til dæmis átt vel, þægilegir en samt penir.
Fólk í ráðherraembættum þarf að klæða sig á viðeigandi hátt. Það má alveg minna á að starfinu fylgir vald og ákveðin virðing og þarf slíkt að endurspeglast í fatavali, förðun og hárgreiðslu.“
Mikil umræða er um þennan Smartlandspistil á Facebook-síðu Hringbrautar og þar gefur kona tóninn með þessum ummælum:
„Marta Smarta er ekki mjög smart í krítikinni sinni“
„Marta Smarta þarf að læra að þegja ef hún hefur ekkert gott að segja,“ karlmaður.
Á Facebook-síðu Smartlandsins eru mjög hörð viðbrögð við pistlinum, en ummæli eru alls 73, flest neikvæð. Það sama má segja um Facebook-síðu mbl.is, þar sem eru yfir 100 ummæli. Ein kona segir:
„Afskaplega ósmekklegt hjá MBL – Við hlustum á hvað þessar flottu konur hafa fram að færa en metum þær ekki eftir klæðaburði“
Önnur undrast predikunartóninn í fréttinni og segir auk þess:
„Ef það á að spá í í fatavali kvenna þá þarf að gera það með greinandi hætti en ekki svo dæmandi, og þá sérstaklega ekki að taka eina konu fyrir eins og Inga Sæland er tekin fyrir í þessari frétt.“
Margir gagnrýna það að athyglinni sé beint að klæðaburði stjórnmálakvenna með þessum hætti en Arndís Björnsdóttir er ekki sammála því. Má segja að hún taki upp hanskann fyrir Mörtu:
„Er ekki allt í lagi að tala aðeins um fatnað þessara föngulegu kvenna? Þær eru glæsilegar, hver á sinn hátt. Óska þeim velfarnaðar í nýjum störfum.“
Önnur kona segir hins vegar:
„Það er ótrúlegt þetta fatatal sem byrjaði í forsetakosningabaráttunni. Mér er nákvæmlega sama um hvað föt þessa fólki kostuðu, finnst þau öll voða fín. Man ekki til þess að tíundað hafi verið hvað föt karlanna kostuðu og ekkert um föt karlframbjóðenda svona yfirleitt. Forsetagæinn lenti jú í umtali vegna þess að hann var í brúnum skóm og blárri skyrtu. En það eru víst einhverjir sem vinna við að greina fatnað frammáfólks.“
Og ein segir:
„Finnst athugasemdir um hvað fatnaður einstaklings eða fólks kostar niðrandi og fyrir neðan þeirra virðingar, sama hvort það sé Forseti Íslands, Ráðherrar eða almennur borgari. Skil ekki hver meiningin er með þessum skrifu. Kjólinn er glæsilegur og fer Forsetisráðherra vel. Afhverju er ekki fatnaður hinna á myndinni verðlagður þá líka ?“
Síðan er það kona sem finnst vera eineltisbragur á skrifunum:
„MMWJ skrifar þennan ómerkilega pistill á sinn hátt og smættar fólk að venju sem henni hugnast ekki. Minnir á eineltis týpuna í skólanum forðum daga. Ömurð.“
