Unnur er gullsmiður, einkaþjálfari, fitnesskeppandi og áhrifavaldur.
Hún birti á dögunum tvær myndir á Instagram. Myndirnar voru báðar teknar í desember, nema myndin til vinstri var tekin árið 2023 og þessi til hægri árið 2024.
Unnur fagnar kærkominni þyngdaraukningu en hún hefur lagt hart að sér á árinu.
„Endurheimti sjálfa mig OG líkamann minn á árinu sem er að líða. My oh my hvað það er geggjuð tilfinning,“ segir hún og bætir við: „Gott að vera komin aftur!“
Unnur sneri aftur á keppnissviðið í maí eftir fimm ára pásu. Hún var gestur í Fókus, hlaðvarpsþætti DV, í febrúar og opnaði sig um pásuna, líkamlegu og andlegu heilsuna og margt annað.
Unnur sagði frá því hvernig hún missti matarlystina, átti erfitt með að finna gleðina og brosa, hún hafði fjarlægst fólkið sitt og fann að hún var búin að ná botninum. Þá var bara eitt í stöðunni: Standa á fætur og rífa sig upp.
„Þegar maður er kominn á botninn er maður bara kominn á botninn, þá er spurningin hvernig ætlum við að komast upp? Ég ákvað að setjast niður með sjálfri mér og líta inn á við, bara hver er ég? Það var mjög erfið spurning, ég skrifaði hjá mér alls konar punkta og ég ákvað að gera það sem hafði virkað fyrir mig áður […] að finna ástríðuna mína. Það er fitnessið.“
Unnur tók upp símann og hafði samband við þjálfara sem hún hafði áhuga að vinna með. Hún hefur einnig farið til sálfræðings til að styrkja andlegu hliðina.
„Ég byrjaði að æfa daglega, ógeðslega erfitt en ég mætti samt […] Svo bara gjöra svo vel að borða. Ég var búin að segja [þjálfaranum] hvað markmiðið mitt væri, að mig langaði að keppa eftir ár.“
„Svo byrjaði ég að borða, píndi svoleiðis ofan í mig matinn. Fékk mjög sveigjanlegt og fínt matarprógram, engir öfgar, bara borða,“ sagði hún.
Sjá einnig: Unnur þurfti að pína ofan í sig mat – „Ég tók bara einn dag í einu, klukkutíma fyrir klukkutíma“
Unnur segir að hún hafi þurft að neyða sig til að borða og hafi oft kúgast, matarlystin hafi ekki verið til staðar en hún vissi að hún þyrfti að næra sig. „Ég tók bara einn dag í einu, bara klukkutíma fyrir klukkutíma. Stillti vekjaraklukkuna: Borða. Tveimur tímum seinna: Borða.“
„Þegar ég fór að æfa og borða bættist svefninn í kjölfarið. Þetta er ótrúlega einfalt, það vita þetta allir en það er erfitt að byrja. Það er erfitt að fara af stað, en um leið og þetta er komið þá finnurðu hvað þú hefur miklu meiri orku. Auðvitað koma bakslög líka, þú þarft bara að díla við það hverju sinni.“
Fylgstu með Unni á Instagram. Hún er dugleg að deila ferlinu með fylgjendum. Hún er hvetjandi og sýnir allt, ekki bara glansmyndina.
Horfðu á þáttinn í heild sinni hér, eða hlustaðu á hann á Spotify.
