Flugfélagið PLAY kom farþegum sínum heldur betur á óvart á dögunum með óvæntu jólaflugi. Um var að ræða flug frá Kaupmannahafnar til Keflavíkur og var meirihluti farþeganna um borð Íslendingar.
Farþegarnir vissu varla hvaðan á sig stóð veðrið þegar jólasveinn mætti skyndilega til leiks, þeim yngstu til mikillar hamingju. Farþegum var boðið uppá Malt og appelsín, piparkökur og konfekt í fluginu og þá var hljómsveit um borð sem spilaði jólatónlist fyrir farþega í háloftunum.
Rúsínan í pylsuendanum var síðan þegar flugvélin var lent í Keflavík. Í komusalnum voru það ekki töskur sem runnu niður töskubandið heldur jólagjafir sérmerktar hverjum og einum farþega. Um var að ræða veglegar gjafir frá velviljuðum fyrirtækjum. Elko tók meðal annars þátt í verkefninu og fengu nokkrir heppnir farþegar airfryer, hrærivél og ryksugu að gjöf. Allir farþegar fengu serum frá Bio Effect, jólakaffi frá Te & kaffi, hálsmen frá Myletra og súkkulaði frá Freyju.
Þá fengu börnin stóra bangsa frá Kids Coolshop að gjöf.
Á Instagram-síðu Play má sjá skemmtilegt myndskeið frá jólafluginu (endurræsið síðuna ef færslan birtist ekki í fyrsta kasti)
View this post on Instagram
„Þetta var eitt skemmtilegasta verkefni sem ég hef tekið þátt í. Aðallega því það var svo gaman að sjá gleðina úr augum farþeganna þegar gjafirnar komu á töskubandið. Þetta var smá svona Love actually-augnablik. Markmiðið með þessu verkefni var fyrst og fremst að gleðja og það tókst sannarlega. Pælingin var líka að koma með jólaandann á skrifstofuna en til að pakka inn 200 gjöfum og sérmerkja þær þarf margar hendur og við í markaðsdeildinni fengum starfsfólk PLAY úr öðrum deildum til að hjálpa okkur sem var ótrúlega gaman. Þetta var mikil vinna en allt þess virði,“ segir Nadine Guðrún Yaghi, forstöðumaður samskipta og markaðssviðs Play.
