Öll eigum við okkar uppáhalds sjónvarpsþætti og uppáhalds sjónvarpsþátta persónur. Persónur sem ylja okkur og veita okkur gleði og kátínu. En vitaskuld er önnur hlið á peningnum og þar af leiðandi persónur sem við gjörsamlega fyrirlítum og knýja heift okkar. Það þýðir ekki endilega að sjónvarpsþátturinn sé slæmur, þvert á móti þýðir það að hann nær að vekja hjá okkur tilfinningar.
Á síðunni Ranker.com kusu netverjar sína hötuðustu sjónvarpsþáttapersónur og eru þær 10 efstu eftirfarandi.
„Litli fingur“ er einn útsmognasti og smeðjulegasti karakterinn af mörgum útsmognum og smeðjulegum í þáttunum um Krúnuleikana. Áhorfendur vita sjaldnast hvar þeir hafa hann og traustið í hans garð er núll.
Margir segja að Rachel hafi pirrandi rödd, sem er stórt atriði í söngleikjaþáttum, en enn þá fleiri hata Rachel út af ákvörðununum sem hún tekur og áhrifum á aðrar persónur. Og einhverra hluta vegna kemst hún alltaf upp með allt.
Hataðasta persónan í japönskum teiknimyndaþáttum. Shou Tucker framkvæmir ólöglegar tilraunir á eiginkonu sinni og dóttur án þess að blikka auga.
Todd Alquist er ekki aðeins siðblindur glæpamaður sem vílar ekki fyrir sér að drepa eða pína fólk. Hann er einnig stórskrýtinn og hefur ákaflega óþægilega nærveru. Áhorfendur eru aldrei í rónni þegar hann er á skjánum.
Hataðasta teiknimyndapersónan. Caillou þykir afar pirrandi krakki, frekjudós með pirrandi rödd og vælir sífellt.
Nokkrar persónur úr The Walking Dead voru ofarlega á blaði hjá netverjum, svo sem Ed Peletier, Lori Grimes og Shane Walsh. Engin kemst þó nálægt hinu miskunnarlausa en jafn fram sjarmerandi illmenni Philip Blake, eða The Governor.
Þættirnir um Soprano mafíufjölskylduna hrundu af stað byltingu í sjónvarpsþáttagerð og það var ekki síst vegna frábærrar persónusköpunar. Livia Soprano, móðir mafíuforingjans Tony, er persónan sem áhorfendur elska að hata. Hún spilar með fólk og veldur deilum í fjölskyldunni og er ekki lítið pirrandi og neikvæð.
Cersei er langlífasta illmennið í Game of Thrones. Allt frá fyrsta þætti og fram á þann síðasta er hún óvinur okkar. Verk hennar eru að stærstum hluta knúin áfram af ást á börnunum sínum, sem væri virðingarvert…..ef börnin hennar væru ekki algjör afstyrmi eins og hún sjálf.
Við kynnumst Ramsay frekar seint í sögunni þegar við erum rétt byrjuð að jafna okkur á Joffrey. Ramsay er algjörlega truflaður sadisti. Hann er svo vondur að fólkið sem hann pínir fær samúð áhorfandans, jafn vel þó það hafi sjálft framið ódæði skömmu áður.
Game of Thrones tekur þrjú efstu sætin og vitaskuld er það Joffrey Baratheon sem situr á hásætinu. Hinn úrkynjaði og siðfatlaði vælukjói sem situr ranglega á stóli konungs Westeros í skjóli móður sinnar og afa. Jack Gleeson lék hlutverkið svo vel að hann sem leikari varð hataður í kjölfarið og þurfti að taka sér hlé frá greininni.
