Gunnar Smári Egilsson fjölmiðlamaður og forystumaður í Sósíalistaflokknum greinir frá því á Facebook að hann hafi aðeins einu sinni á ævinni eldað hamborgarhrygg en hann vill meina að ekki sé hægt að nálgast hrygg af glaðari grísum.
Vísar Gunnar Smári til umræðu sem m.a. hefur heyrst frá Samtökum um dýravelferð sem hafa hvatt fólk til að fá sér ekki hamborgarhrygg um jólin vegna slæmrar meðferðar á svínum í svínabúskap hér á landi
„Ég hef bara einu sinni eldað hamborgarhrygg, sem fólk er að hvetja okkur til að sniðganga nú um jólin vegna illrar meðferðar á svínum í verksmiðjubúum. Því miður er líklega ekki hægt að nálgast hrygg af glaðari grísum.“
Gunnar Smári segir síðan frá sérvitringi sem hann hafi keypt mat af en það er ekki fyllilega skýrt hvort hamborgarhryggurinn sem hann eldaði hafi komið þaðan:
„Mathieu Wirk Zevenhuizen, sem var vert í Hreðavatnsskála um skeið, vildi rækta svín bak við skálann, fóðra þau á afgöngum eins og gert hefur verið í vertshúsum öldum saman og selja gestum svo kjötið. En honum var meinað þetta dýrahald, byggt á hefðum sem ná aftur fyrir ritmál. Ég veit ekki hvað varð um Mathieu, ég stoppaði alltaf hjá honum og fékk mat ættaðan frá Þýskalandi og Sviss og sætti mig við Pink Floyd úr hátölurunum, eins og ég gerði þegar ég var unglingur lokaður inn í drengjaherbergjum í Vogahverfinu. Mathieu var sérvitringur eins og svo margir sem fá Ísland á heilann. Við mættum njóta þess meira að þetta er land byggt af sérvitringum, hætta að láta sem við séum venjulegt fólk sem fellur inn í stærri samfélög.“
Gunnar Smári lýsir síðan ítarlega hvernig hann eldaði hrygginn og beitir við það litskrúðugum myndlíkingum en skrifar að lokum:
„Það var maður í mat hjá mér sem var alinn upp við að borða hamborgarhrygg á aðfangadag. Hann sagði að þetta væri besti hamborgarhryggur sem hann hefði smakkað, en lét mig lofa því að segja mömmu sinni ekki frá því. Ef þið eruð enn að lesa, rennur upp fyrir ykkur að ég hef gabbað ykkur til að lesa grobb yfir gömlum töktum í eldhúsinu.“
