Tónlistargoðsögnin Cher tilkynnti aðdáendum í vikunni að næsta platan hennar yrði að öllum líkindum hennar síðasta. Hún væri orðin of gömul til þess að vera í bransanum enn þá.
„Ég er orðin eldri en mold, ok? Ég er elsta manneskjan í næstum hverju herbergi sem ég stíg inn í, nema ég sé á elliheimili,“ sagði Cher kímin á tónleikum í Lyceum höllinni í London á þriðjudag. Sagði hún að það væri kominn tími til að stíga til hliðar og láta yngra fólk um að búa til tónlist.
Cher, sem heitir fullu nafni Cheryil Sarkisian, er 78 ára gömul í dag. Sjaldnast er lognmolla í kringum hana, allra síst núna þar sem hún var að gefa út nýja sjálfsævisögu þar sem kennir ýmissa grasa. Þá hefur samband hennar við rapparann Alexander „AE“ Edwards vakið athygli. En hann er 38 ára gamall, 40 árum yngri en hún.
Cher gefur brátt út nýja breiðskífu, þá fyrstu með eigin lögum síðan árið 2013. Segist hún vilja koma plötunni frá sér áður en hún hættir endanlega í tónlist eins og kemur fram í frétt The Mirror um málið.
Í gegnum tíðina hefur Cher sagt kynsystrum sínum til syndanna fyrir það að kvarta yfir að eldast. Viðurkennir hún þó að hún myndi alveg vilja vera sextug aftur. Hún viðurkennir einnig að það hafi ekki alltaf verið gott að eldast og að hún vilji frekar vera innan um yngra fólk.
„Ég kann vel við ungt fólk af því að vinir mínir vilja ekki lengur hafa gaman,“ sagði Cher. „Þeir geta bara farið í rass og rófu og verið gamlir skarfar.“
