Athugasemd Frosta dró dilk á eftir sér og var hann harðlega gagnrýndur. Í nýjasta þætti af Spjallið með Frosta Logasyni segir Frosti að það sem hafi bjargað honum frá því að verða slaufað var að biðjast ekki afsökunar.
Í þættinum ræðir Frosti við Bergþór Másson, hlaðvarpsstjórnanda sem margir þekkja sem annan Skoðanabróðurinn. Talið barst að „woke“ fólki og segist Bergþór eitt sinn hafa verið „woke“ en ekki lengur.
„Þú getur ekki ímyndað þér hvað ég er glaður að heyra þetta og sjá að einhverjir svona strákar úr þessari kreðsu sjái þetta ljós einhvern veginn,“ segir Frosti brosandi við Bergþór og bætir við að í mörg ár hafi hann verið settur í „fúlu kalla félagið“ vegna skoðana sinna.
„Í fyrsta skipti þar sem var gerð massíf tilraun til að slaufa mér, það eru svona átta ár síðan. Þá átti að slaufa mér því ég sagði að konur og karlar væru líkamlega ólík,“ segir Frosti
Frosti segir málið hafa snúist um Íslensku tónlistarverðlaunin árið 2017. Það ár var lag Hildar Kristínar Stefánsdóttur, „I‘ll walk with you“ valið sem popplag ársins.
Frosti ýjaði að því að Hildur hafi aðeins unnið vegna þess að hún er kona. „Lyktin af þessu er sú að Hildur hafi unnið þetta bara af því hún er kona,“ sagði hann.
Hildur svaraði honum á sínum tíma og olli athugasemd Frosta talsverðu fjaðrafoki. Hildur sagðist vilja fá afsökunarbeiðni frá Frosta, sem aldrei kom. Í dag segir Frosti að það hafi bjargað honum frá slaufun, að biðjast ekki afsökunar.
Frosti segir að á þessum tíma hafi verið mikil pressa frá ákveðnum hóp í samfélaginu að konur myndu vinna til verðlauna á hátíðinni.
„Þetta var á svipuðum tíma og það voru einhverjar hótanir, ef það verða ekki jafn margar konur á Þjóðhátíð í Eyjum þá verður allt brjálað, og allir voru skíthræddir,“ segir hann.
Frosti segir að þetta ár hafi karlmenn verið í miklum meirihluta sigurvegara og þegar kom að því að tilkynna popplag ársins hafi Hildur unnið. Hann segir að honum hafi þótt sterkari lög í flokknum sem verðskulduðu frekar sigurinn.
„Mér fannst bara svo augljóst að hún hafi fengið þetta því dómnefndin var að reyna að rétta hlutföllin. Ég segi: „Því miður, þetta lyktar af því að hún hafi unnið þetta bara því hún er kona.““
Frosti segir að það hafi allt orðið vitlaust í kjölfarið. Hann tók málið fyrir í útvarpsþættinum Harmageddon á sínum tíma og hringdu hlustendur í þáttinn.
Þegar hann var að svara einum hlustanda um hvort konur væru jafn hæfileikaríkar og karlmenn sagði Frosti að karlmenn væru sterkari trommarar.
„Ef við tölum um einhverja þungarokkstrommustíla, eitthvað spíttmetaltrommustíla, þá væri kannski karlmenn betur til þess fallnir að tromma þá trommustíla, því það eru svona líkamlegir… það varð allt vitlaust. Ég hafði aldrei lent í öðru eins og þeim tíma, ég hef nú lent í meira síðan þá,“ segir hann við Bergþór.
KÍTÓN, félag kvenna í tónlist, gaf einnig út yfirlýsingu sem vakti mikla athygli.
Fjölmiðlar fjölluðu einnig um málið og þekktir einstaklingar blönduðu sér í umræðuna. Frosti nefnir sérstaklega Facebook-færslu tónlistarmannsins Páls Óskars.
„Það sem bjargaði mér í raun og veru var að ég baðst ekki afsökunar,“ segir hann og bætir við að það hafi verið lykilatriði.
Frosti ræðir þetta nánar í spilaranum hér að neðan á mínútu 3:00.
