Lögreglan lýsir gjarnan eftir fólki. Stundum eftir fólki sem er saknað, stundum er lýst eftir vitnum og stundum þarf lögregla að ná tali af ákveðnum einstaklingum. Lögreglan hefur þó sjaldan lýst eftir skipuleggjendum þorrablóta, en það gerði lögreglan á Norðurlandi vestra í dag.

Embættið birti eftirfarandi færslu á Facebook:

„Það er ekki ráð nema í tíma sé tekið! Okkur langar að heyra í þeim sem eru að skipuleggja þorrablót á nýju ári, fólki í þorrablótsnefndum og þeim sem koma að þessum samkomum með einum eða öðrum hætti.“

Fólk var ekki alveg að ná utan um þessa eftirlýsingu og vildi vita hvað vakti fyrir lögreglu. „Ætlið þið að vera með skemmtiatriði hjá þeim sem svara?,“ spurði einn. Annar velti fyrir sér hvort lögreglan væri á höttunum eftir boðskortum. Enn annar spáði því að hér væri lögreglukórinn að leita sér að „giggi“.

Einhverjir veltu fyrir sér hvort óprúttnir aðilar hefðu tekið yfir aðgang lögreglunnar á Facebook.

Emæbættið svaraði þó í kvöld að þessi færsla væri orðin hin skemmtilegasta, en ítrekaði að forvarnafulltrúa embættisins langi raunverulega að heyra frá þorrablótsnefndum.

„En svona í fullri alvöru þá erum við með þungavigtarmenn og konur í hinar ýmsu stöður. Við eigum söngfólk, landsliðsfólk í körfubolta, fótboltastjörnur, bekkpressu kempur úr Gym80, sundkennara, áhugaljósmyndara, veiðimenn og fleira og fleira, svona ef einhver er að spá í giggi.“

Sem stendur má því segja að enn sé á huldu hvaða erindi lögreglan hefur við þorrablótsnefndir, en það má greinilega fá liðstyrk úr röðum lögreglunnar á Norðurlandi vestra, ef þorrablótinu ykkar vantar aðstoð.