Breska sjónvarpskonan Narinder Kaur sætir nú harðri gagnrýni eftir að hafa varpað fram spurningu á samfélagsmiðlinum X um útlit Katrínar prinsessu af Wales. Spurði Kaur hvers vegna prinsessan, sem er 42 ára, væri orðin áberandi ellilegri í útliti og hvort það væri vegna þess að hún reykti. Hafa þessar vangaveltur vakið mikla reiði í Bretlandi og hefur Kaur fengið mörg hatursfull skilaboð og á fullt í fangi með að svara fyrir sig. Hefur henni verið bent á að með þessum vangaveltumj hafi hún verið að sýna prinsessunni, sem barist hefur við krabbamein að undanförnu, mikla ónærgætni.
Fjallað hefur verið um málið í mörgum fjölmiðlum í dag til að mynda Mirror.
Kaur öðlaðist frægð árið 2001 með þátttöku í raunveruleikaþáttunum Big Brother og hefur síðan þá starfað við sjónvarp og hefur til að mynda oft verið með innslög í morgunþættinum Good Morning Britain á sjónvarpsstöðinni ITV.
Katrín Prinsessa sást opinberlega í gær við árlega athöfn í London til minningar um fallna hermenn. Mynd var tekin af Katrínu þar sem hún stóð á svölum utanríkisráðuneytisins ásamt Soffíu, hertogaynju af Edinborg, eiginkonu Játvarðs prins föðurbróður Vilhjálms prins, eiginmanns Katrínar.
Eitthvað fannst Kaur prinsessan hafa elst óvenju mikið, miðað við myndina, og spurði í færslu á samfélagsmiðlinum X hverju þetta sætti og hvort prinsessan hefði byrjað að reykja. Sjálf er Kaur níu árum eldri en prinsessan.
Kaur eyddi færslunni en viðbrögðin voru ekki lengi að láta á sér kræla á meðan færslan var í loftinu.
Á X-síðu hennar er nú að finna fjölda færslna þar sem hún segist hafa orðið fyrir kynþáttaníði og annars konar svívirðingum en Kaur er dökk á hörund.
Hefur hún verið sérstaklega gagnrýnd fyrir að gera útlit prinsessunnar, í ljósi krabbameinsmeðferðar hennar, að umtalsefni.
Þegar fyrstu viðbrögð bárust við færslunni sagðist hún hafa verið að spyrja í fullri einlægni og að um misskilning væri að ræða. Bróðir hennar sem hafi gengið í gegnum lyfjameðferð við krabbameini, eins og prinsessan, hafi ekki orðið ellilegri í útliti. Hann hafi einfaldlega dáið. Svörin við þessari færslu voru einkum á þá leið að ekki væri um misskilning að ræða, hún hafi verið andstyggileg og að Kaur ætti að biðjast afsökunar.
Í kjölfarið birti Kaur stutt myndband á X-síðu sinni þar sem hún baðst afsökunar og sagði færsluna hafa verið heimskulega. Hún sagði aftur á móti að það kynþáttaníð og svívirðingar sem hún hefði þurft að þola ætti engan rétt á sér. Hún gat hins vegar ekki stillt sig um að gagnrýna prinsessuna fyrir að njóta þeirra forréttinda að geta hvílt sig á meðan hún væri að glíma við krabbameinið án þess að hafa áhyggjur af peningamálum.
Ber Kaur sig illa á X-síðu sinni og ítrekar ótt og títt að hún hafi aðeins spurt spurningar um öldrun.
