Gypsy Rose Blanchard á von á sínu fyrsta barni. Hún er nú í sambandi með Ken Urker en var áður gift Ryan Anderson, þau eru nú skilin að borði og sæng. Faðerni ófædds barns hennar hefur verið talsvert á milli tannanna á fólki, þá sérstaklega vegna tímalínu sambands hennar við báða mennina. Gypsy ákvað að láta athuga faðerni barnsins svo hún gæti endanlega kveðið niður orðróminn.
„Það hafa verið margar kjaftasögur á kreiki um faðerni barnsins,“ sagði Gypsy á Instagram í gær. „Þó við höfum verið viss frá upphafi þá finnst mér kominn tími til að leggja þessar kenningar til hliðar.“
Gypsy birti skjáskot af faðernisprófinu sem staðfesti að það væru 99,9 prósent líkur að Ken sé faðir barnsins.
„Ken verður frábær faðir. Við erum svo spennt að fá litlu stúlkuna okkar í hendurnar.“
Settur dagur er í janúar 2025.
Gypsy Rose Blanchard varð frjáls kona í desember síðastliðnum eftir að hafa afplánað átta ár af tíu ára dómi sínum. Hún var dæmd fyrir morðið á móður sinni, Dee Dee Blanchard, árið 2016. Gypsy þurfti að þola margra ára ofbeldi af hendi móður sinnar sem glímdi við sjúkdóminn Munchausen by proxy, sem gerði það að verkum að hún beitti hinum ýmsu brögðum til að sannfæra umheiminn, sem og dóttur sína, um að Gypsy Rose væri langveik.
Gypsy giftist Ryan Anderson á meðan hún sat inni og varði fyrstu mánuðum frelsisins með honum. Leiðir þeirra skildu stuttu síðar og byrjaði Gypsy með fyrrverandi unnusta sínum, Ken Urker. Þau voru trúlofuð á meðan hún sat inni frá 2018 til 2020.
