Í nýlegu myndbandi sem rapparinn Ludacris birti á samfélagsmiðlum má sjá hann fá sér jökulvatn að drekka, beint úr jöklinum sjálfum. Sérfræðingar mæla ekki með að fólk fylgi fordæmi rapparans.
„Ég hef aldrei áður smakkað ferskt jökulvatn í lífi mínu og því er þetta í fyrsta skipti,“ segir Ludacris í myndbandinu, sem var tekið upp í Alaska fylki fyrir nokkrum vikum síðan. Segir hann að þetta hafi verið á „fötulistanum“ sínum. Því næst dýfir rapparinn brúsa í bráðnað vatnið, fær sér sopa og hrópar af kæti.
Myndbandið hefur farið eins og eldur í sinu á samfélagsmiðlum. Næstum 50 milljón manns hafa horft á það á Instagram og rúmlega 30 milljónir á TikTok.
Eins og greint er frá í tímaritinu Food & Wine þá lýstu margir áhyggjum af velferð rapparans í athugasemdum við færsluna. „Hversu veikur varð hann af þessu?“ spurði einn. „Brósi er að dreypa á fínum frumstæðum saur frá forfeðrunum,“ sagði annar.
Myndbandið er ekki það eina á samfélagsmiðlum þar sem fólk sést drekka jökulvatn. Enda virðist það vera, og kannski er, gríðarlega svalandi og maður gæti haldið að það sé jökultært. En er það rétt? Er sniðugt og öruggt að drekka jökulvatn?
Stutta svarið er að það sé ekki fullkomlega öruggt að drekka jökulvatn. En það er heldur ekki jafn óhollt og margir halda.
Bent hefur verið á að í sumum jöklum eru svokallaðir ísormar. Fundist hafa nærri 80 tegundir af slíkum ormum, meðal annars í jöklum Alaska og Kanada. Þetta eru litlir ormar sem dveljast inni í ísnum en koma upp á yfirborðið til að éta þörunga á kvöldin og morgnanna.
View this post on Instagram
Þó það kunni að hljóma ógeðslega að drekka slíka orma þá eru þeir reyndar alveg meinlausir mannfólki. Einnig leysast þeir í sundur þegar hitastigið er komið upp í 5 gráður á selsíus kvarða.
Hættan af því að drekka jökulvatn stafar hins vegar af bakteríum, það er sníkjudýrum sem kallast á latínu giardia og cryptosporidium, annars vegar og þungmálmum hins vegar.
„Þó að spurningin hljómi einföld þá er svarið frekar flókið og veltur á því hvar jökullinn er og hversu mikið vatn er drukkið,“ segir jöklafræðingurinn Gabriel Wolken. „Þetta fer til dæmis eftir því hvar á jöklinum vatnið er tekið, það getur verið mjög gruggugt sums staðar með miklum svifefnum sem þarf að sía úr því. En óháð staðsetningu getur jökulvatn haft ýmis aðskotaefni úr úrfellingum andrúmsloftsins, dýrum og landslaginu í kring.“
Nefnir hann að í jökulísnum safnist fyrir þungmálmar úr andrúmsloftinu, til dæmis kvikasilfur sem berst frá iðnaðarsvæðum.
