Söngvarinn Liam Payne lést þann 16. október eftir að hann féll frá þriðju hæð hótels sem hann dvaldi á í Buenos Aires, Argentínu. Fyrir liggur að söngvarinn hafði neytt fíkniefna áður en hann lést og hefur lögreglan í Buenos Airs rannsakað hvaðan hann fékk efnin.

Heimildarmaður innan embætti saksóknarans í Buenos Aires segir nú í samtali við People að lögregla telur sig vita hvaðan fíkniefnin komu. Líklega hafi söngvarinn keypt þau af starfsmanni hótelsins.

„Það virðast vera gögn þess efnis að starfsmaður hótelsins útvegaði Payne fíkniefni. Ákæra vegna fíkniefnalagabrots gæti verið framundan.“

People greinir eins frá því að Payne hafði verið hent út af öðru hóteli rétt áður en hann lést. Hafði söngvarinn þar verið öðrum gestum til ama og virtist undir áhrifum vímuefna.

The New York Post greindi frá því í nótt að Payne lést undir áhrifum sterks vímugjafa sem kallast Cristal, en efnið getur valdið gífurlegum ofskynjunum. Efnið veldur því að notendur þeirra upplifa miklar hæðir- og lægðir, og geta orðið árásagjarnir. Lögregla telur líklegt að Cristal útskýri hvers vegna söngvarinn var í miklu ójafnvægi daganna áður en hann lést. Hann hafði meðal annars rústað hótelherberginu sínu eins og sjá má á myndinni með fréttinni.

Ein kenning er sú að söngvarinn hafi upplifað miklar ofskynjanir og það valdið því að hann féll.