Stuð var á frumsýningu Útilegu í Smárabíói á mánudaginn. Útilega er ný þáttaröð sem fer í loftið í Sjónvarpi Símans Premium í dag, þann 17. október. Þættirnir fjalla um sex pör á fimmtugsaldri sem hafa haldið hópinn lengi og eru á leið í hina árlegu útilegu þar sem þau komast undan hversdagslegu amstri og skilja áhyggjurnar eftir heima, þær eru samt alltaf með í för.

Þættirnir eru í leikstjórn Fannars Sveinssonar framleiddir af Glassriver, en saman unnu þau einnig saman að gamanþáttunum Venjulegu Fólki. Í aðalhlutverkum eru Aldís Amah Hamilton, Björn Thors, Elma Lísa Gunnarsdóttir, Helga Viktoría Þorvaldsdóttir, Hjálmar Örn Jóhannsson, Jóhann G. Jóhannsson, Jóhanna Friðrika Sæmundsdóttir, Jörundur Ragnarsson, Júlíana Sara Gunnarsdóttir, Lilja Nótt Þórarinsdóttir, Svandís Dóra Einarsdóttir, Vigdís Hrefna Pálsdóttir og Þorvaldur Davíð Kristjánsson.

Þættirnir eru skrifaðir af Sveinbirni I. Baldvinsyni og Sigurði G Valgeirsyni.

„Það er ekki bara einvalalið leikara að taka þátt í Útilegu heldur fyrsta flokks fagfólk bak við tjöldin. Við erum afskaplega spennt að heyra viðbrögð áhorfenda sem munu margir tengja við margt af því sem gerist í þáttunum þó að ýkt sé enda snýst allt í þeim um klassíska íslenska útilegu,“ segir Birkir Ágústsson, framkvæmdarstjóri Miðla.

Horfðu á stiklu fyrir þættina hér að neðan.

Frumsýning fór fram í Smárabíói á mánudaginn. Sjáðu myndir frá kvöldinu hér að neðan.