TW: Lýsingar á ofbeldi
Þann 22. október árið 2014 voru Jack, 12 ára, og Paul, níu ára, myrtir af föður sínum Darren Sykes, þrátt fyrir að móðir þeirra hafði varað dómstóla við honum. Hún var búin að segja að hún vissi að Darren væri fær um að myrða drengina. Dómarinn krafðist þess samt sem áður að þeir myndu fara til hans í fimm tíma í senn, án eftirlits. Það tók ekki fimm tíma fyrir hann að klára voðaverkið, hann þurfti aðeins fimmtán mínútur.
Claire Throssell sagði sögu sína í einlægu viðtali við Fabulous.
Fyrstu þrjú ár hjónabandsins voru góð en allt breyttist eftir að faðir Claire lét lífið. „[Pabbi] var hindrun sem Darren var ekki tilbúinn að fara yfir,“ segir hún.
„Þegar hann dó og ég var komin fimm mánuði á leið og á viðkvæmum stað, byrjuðu að renna á hann tvær grímur. Þegar Jack fæddist þá sleppti hann alveg takinu á því gamla og sýndi sitt sanna sjálf.“
Hún útskýrir hvernig þetta byrjaði. Fyrst voru þetta furðulegar athugasemdir. Eins og krani sem lekur, en síðan er alveg skrúfað frá honum.
„Allt í einu er flóð og þú ert að drukkna og sérð ekki leiðina út.“
Claire segir Darren hafa beitt hana líkamlegu og andlegu ofbeldi. „Hann beitti mig ofbeldi í fjórtán ár og strákana í allavega sex ár. Þeir grátbáðu mig að fara frá honum.“
Hún rifjar upp atvikið sem setti síðasta naglann í kistuna. Darren ætlaði að kýla Jack, þá 12 ára, í andlitið þegar hún kom sér á milli og fékk höggið í handlegginn. „Hann sagði við mig: „Sjáðu hvað ÞÚ lést mig gera.““
Claire fór frá honum þennan dag, sem varð til þess að Darren fór í forræðisdeilu við hana. „Drengirnir sögðu margoft að þeir vildu ekki fara til hans, margoft. Dómarinn krafðist þess samt sem áður að þeir færu til hans í fimm klukkutíma, án eftirlits. Ég hafði skrifað umsögn til dómarans um að hann væri fær um að drepa þá. Það þurfti ekki fimm tíma til að gera það sem hann gerði. Það tók hann bara fimmtán mínútur að taka þrjú líf.“
Claire segir að hún lifi ekki lengur lífinu, hún sé bara á lífi.
„Darren kveikti fjórtán elda með bensíni og setti slagbrand fyrir dyrnar. Hann læsti drengina inni, ekki bara svo að slökkviliðið myndi ekki komast inn, heldur líka svo drengirnir kæmust ekki út.“
Claire rifjar upp daginn, hvernig hún þurfti að kveðja annan þeirra í síðasta skipti á spítalanum til að fylgja hinum á næsta spítala, hvernig drengirnir börðust fyrir lífi sínu og hvernig Jack reyndi að bjarga yngri bróður sínum í spilaranum hér að neðan.
