Sögusagnir eru farnar á kreik um að hjónaband hertogahjónanna, Harry og Meghan, sé í andarslitrunum. Þar sem þau hafa lítið sést saman undanfarið er því jafnvel haldið fram að þú séu þegar búin að slíta samvistum.

Geo News segir að nú verði ekki aftur snúið hjá hjónunum og stefnir í ljótan og harðvígan skilnað. Kevin O’Sullivan er sérfræðingur í málefnum konungsfjölskyldunnar og hann sagði í viðtali við TalkTV að þau séu komin í kalt stríð.

„Hún er að reyna að vera betri en hann og hann er að reyna að vera betri en hún, svo staðan fer úr öskunni í eldinn“

Kinsey Schofield, annar konunglegur sérfræðingur, tekur  undir þetta og segir örvæntingu ríkja meðal hjónanna. „Þetta er eiginlega bara örvænting.“

Express segir að sérfræðingar meti stöðuna svo að Harry dauðsjái eftir því að hafa komið sjálfum sér í útlegð frá bresku konungshöllinni. Hann sé fyrst núna að átta sig á því hvað hann hefur misst.  Á sama tíma sé Meghan að horfa fram á við og ætli sér að koma sjálfri sér aftur á kortið.

Nóg hefur verið að gera hjá hjónunum sem hafa mætt á fjölda viðburða, þó í sitthvoru lagi. Harry er nú á leiðinni heim eftir þriggja vikna ferðalag til New York. Breskir miðlar telja margir að líklega hafi Harry kosið að ferðast einn svo hann gæti hugsað næstu skref. Það sé því stórt samtal sem bíði hans og Meghan þegar heim er komið.

Önnur kenning er þó sú að hjónin hafi hreinlega ákveðið að koma minna fram sem par og meira fram sem einstaklingar. Þar með geti þau skapað nafn hvort fyrir sig.