Flestir kannast við Winter sem persónuna Alex Dunphy í geysivinsælu gamanþáttunum Modern Family. Þættirnir hófu göngu sína árið 2009 og kom síðasta þáttaröðin út árið 2020. Winter var aðeins ellefu ára gömul þegar fyrsta þáttaröð fór í loftið og ólst hún upp fyrir augum áhorfenda.
Winter segir að það hafi ekki verið auðveld ákvörðun að flytja frá Los Angeles en hún sjái ekki eftir því í dag.
„Ég held að L.A. hafi aldrei verið fyrir mig, en ég var bara stressuð,“ sagði hún við E! News.
„Síðan fékk ég þetta tækifæri og ég var bara, veistu hvað? Ég er til í breytingar. Ég er að reyna að græða gömul sár, þroskast og þróast. Þetta hefur stækkað veröld mína til muna.“
Winter, sem er 26 ára í dag, segir að þó margt hafi breyst þá sé sumt alltaf eins, eins og vinátta hennar og meðleikara hennar í Modern Family.
Um Nolan Gould, sem lék bróður hennar, Luke Dunphy, í þáttunum hafði hún þetta að segja: „Hann er bróðir minn. Hann var fyrsti besti vinur minn, sem er mjög fallegt. Við kynntumst þegar hann var tíu ára og ég var ellefu ára, við höfum gengið í gegnum svo margt saman og höfum alltaf verið vinir.“
Hún segir samband allra enn vera sterkt. „Við öll elskum hvert annað, það er ótrúlegt,“ sagði hún og bætti við að „þegar þið eyðið svona miklum tíma saman þá verðið þið fjölskyldan sem þið eruð að leika.“
Winter segir að það hafi verið skrýtið að vinna með sama fólkinu á hverjum degi í tólf ár og síðan allt í einu hætta því eftir að göngu þáttanna lauk.
Hún segir að það hafi hjálpað að eiga stuðningsríkan kærasta en hún og Luke Benward hafa verið saman í fimm ár. Hún segir sambandið byggt á vináttu.
„Ég elska hann og hvað sem framtíðin ber í skauti sér fyrir okkur er það sem er ætlað okkur.“
