Kynlífslæti nágranna voru umfjöllunarefni í þættinum Ísland vaknar á K100 í morgun. Kristín Sif þáttastjórnandi rifjaði upp að þegar hún gisti á hóteli í Chicago með tveimur vinkonum hafi veggirnir á hótelinu verið svo þunnir að þau heyrðu aðra gesti stunda kynlíf.
„Það var fólk að hafa gaman alla nóttina,“ segir Kristín Sif sem segir að það hafi ekki verið gaman að hlusta á þetta.
Voru hlustendur beðnir um að hringja inn ef það ætti slíkar reynslusögur og hringdi kona á miðjum aldri inn sem sagðist mjög oft lenda í þessu. „Ekki á hóteli heldur heima hjá mér. Ekki heima hjá mér heldur nágrannarnir,“ segir konan og hlær.
„Það er út um alla íbúð og það er ekki bara heimilisfólkið.“
Sagði konan aðspurð að líklega væri um Swingersíbúð að ræða. Lætin ættu sér stað yfirleitt um helgar, en inn á milli líka virka daga. Spurði Kristin Sif hana hvort hún hefði einhvern tíma hangið fram á gangi til að sjá gestina, en konan svaraði því neitandi.
Konan segist eiga tvö börn sem verði einnig vör við lætin. „Þau eru 12 og 14 ára og vita hvað er í gangi, sem gerir þetta eiginlega verra.“
Um fullorðið fólk er að ræða og segir konan vandræðalegt að mæta þeim í stigaganginum. Kynlífslætin hafi ekki verið rædd á húsfundum svo konan viti til.
„Mig varðar náttúrlega ekkert um hvað fólk er að gera heima hjá sér. En fólk verður að athuga það að ef það ætlar að búa í fjölbýli þá þarf það að taka tillit til nágrannans, hvort sem það eru drykkjulæti, svona læti eða hvað.“
Sagði konan að oft væri það þannig að hennar fjölskylda væri bara heima að hafa kósí, og yrðu þá vör við lætin.
„Þetta var farið að fara um alla íbúð og hljóðin svona færðust og maður vissi hvar þau voru. Og ég tók mig bara til, fór fram og hringdi dyrabjöllunni hjá þeim. Ég bara truflaði,“ segir konan sem segist lítið hafa heyrst til fólksins eftir það. „Ég bara eyðilagði.“
Sögðust þáttastjórnendur finna til með konunni. Hlusta má á spjallið í heild sinni hér.
