Jóna Guðbjörg Torfadóttir ritar í dag aðsenda grein á Vísi. Í greininni fjallar hún um áfengi og hvað það raunverulega sé.
Hún lýsir sig í upphafi sammála Þórarni Tyrfingssyni, fyrrverandi yfirlækni SÁÁ um að það ætti að vera sérstakt umræðuefni hvort áfengi ætti yfirhöfuð að vera löglegt. Jóna Guðbjörg segir að líklega yrði áfengi flokkað með ólöglegum vímuefnum ef það væri að koma á markað í dag en nú sé eflaust orðið of seint að gera slíkar breytingar:
„Þar sem það þykir svo sjálfsagt og smart að vera með í glasi við öll möguleg og ómöguleg tækifæri.“
Það blasi þó við að dágóður hópur fólks ráði ekki við „löglega vímu- og fíkniefnið áfengi.“ Hún vísar í tölur frá sjúkrahúsinu Vogi þar sem fram komi að heildarfjöldi þeirra sem leiti ásjár þar samsvari 7-8 beiðnum um innlögn á dag. Jóna Guðbjörg minnir á að ekki leiti allt fólk sem á við áfengisvanda að stríða, á Íslandi, til Vogs. Boðið sé upp á áfengismeðferð á fleiri stöðum og sum leiti beint til A.A. samtakanna. Líklega sé þó nokkur fjöldi sem eigi við áfengisvanda að stríða sem telji sig ekki eiga í neinum vanda og leiti sér ekki hjálpar.
Hún svarar þeim rökum að ekki megi takmarka aðgang að áfengi vegna þess minnihluta sem kunni ekki að fara með áfengi:
„Því er til að svara að drykkjuskapurinn er sjaldnast einkamál alkóhólistans. Það er fjöldi fólks sem þjáist vegna drykkju hans og verður með einum eða öðrum hætti fyrir barðinu á honum.“
Jóna Guðbjörg segir að þótt áfengi sé ekki sterkasta vímuefnið byrji fólk oft á áfengi áður en það snýr sér að sterkari vímuefnum. Áfengi sé útbreiddasta vímuefnið og Alþjóðaheilbrigðisstofnunin segi að áfengisvandinn sé eitt mesta heilbrigðisvandamál sem mannkynið standi frammi fyrir. Stofnunin bendi t.d. á að áfengisneysla geti stuðlað að ýmsum tegundum krabbameins.
Þrátt fyrir þetta hafi aðgengi að áfengi verið aukið án þess að fyrir því sé nokkur stoð í lögum. Vefverslanir bjóði upp á áfengi án þess að nokkuð sé að gert og áfengisauglýsingar fái að líðast.
Jóna Guðbjörg segir að það skjóti skökku við að tóbak sé falið í verslunum en áfengi sé sýnilegt fyrir allra augum. Á tóbaksumbúðum séu ýmsar viðvaranir um skaðsemi þess og þar sem ekki standi til að gera áfengi ólöglegt sé að minnsta kosti hægt að setja sambærilegar viðvaranir á áfengisflöskur. Dæmi um slíkar aðvaranir geti verið:
„Drykkurinn veldur ölvun og dómgreindarleysi“ eða „Drykkjuskapur getur skaðað þig og þína nánustu.“
Hvað sem öllum lögum líði sé nauðsynlegt að hafa það í huga hvað áfengi raunverulega sé:
„Það er ekki eðlileg neysluvara heldur fíkni- og vímuefni, þó svo að það sé löglegt.“
Grein Jónu Guðbjargar er hægt að lesa hér.
