Eugene Petersen, fyrrverandi liðþjálfi í bandaríska landhernum, hélt upp á 101 árs afmælið sitt í herstöð í Kaliforníu í gær. Hann þakkar tilteknum gosdrykk langlífið en svo vill til að um er að ræða uppáhalds gosdrykk bókmenntapersónunnar Forrest Gump sem leikarinn Tom Hanks gerði ódauðlegan í samnefndri kvikmynd.
Í umfjöllun CBS kemur fram að dóttir Petersen skýri langlífi föður síns með því að hann sé virkur og sitji ekki auðum höndum en sá gamli er ekki sammála því og segir drykkinn góða skýra langlífið:
„Dr. Pepper.“
Eins og mörgum er eflaust kunnugt fæst Dr. Pepper í verslunum hér á landi.
Petersen var kvaddur til herþjónustu árið 1941, í miðri seinni heimsstyrjöldinni. Hann var í 59 ár í hernum en starfaði síðan fyrir bandarísku póstþjónustuna í 14 ár þar til hann fór á eftirlaun.
Petersen hefur síðan 2010 starfað sem sjálfboðaliði á heilsugæslustöð á herstöðinni þar sem hann hélt upp á afmælið. Herstöðin er undir hatti flughersins og er kennd við hershöfðingjann Robert F. Travis sem lést í flugslysi árið 1950.
Helsta verkefni Petersen á herstöðinni er að aðstoða starfsfólk heilsugæslustöðvarinnar við að halda utan um sjúkraskrár 276.000 einstaklinga sem eiga rétt á þeirri heilbrigðisþjónustu sem veitt er núverandi og fyrrverandi hermönnum. Hann er sagður vinsæll á herstöðinni og er duglegur að deila reynslu sinni með hermönnum og borgaralegu starfsliði herstöðvarinnar.
Petersen er ekki fyrsti langlífi einstaklingurinn sem er mikið fyrir að drekka Dr. Pepper. Elizabeth Sullivan frá Texas var 106 ára þegar hún lést 2017. Tveimur árum áður tjáði hún CBS að hún héldi mikið upp á Dr. Pepper og fengi sér oft drykkinn með morgunmatnum.
