Einnig er hægt að hlusta á Spotify eða hlaðvarpsþjónustu Google.
Fyrir tæplega tveimur árum vakti Helgi athygli á hegðun áhrifavalds gagnvart þáverandi vinkonu hennar. Hann birti hljóðbút úr hlaðvarpsþætti þeirra, sem hætti göngu sinni eftir atvikið, og mátti heyra aðra þeirra tala niður til hinnar. Helgi gagnrýndi hegðun og ummæli áhrifavaldsins harðlega og sakaði hana um að beita vinkonu sína andlegu ofbeldi.
Í kjölfarið fór af stað atburðarás þar sem þær tókust á opinberlega með harðskeyttum færslum, tárvot myndbönd voru birt, hlaðvarpið var lagt af og það slitnaði úr vinskap þeirra.
Helgi man vel eftir málinu. „Ég var á veitingastað og mér var send klippa. Ég hlustaði á hana og raunverulega það sem gerðist var að ég trúði ekki eigin eyrum. Það var ekki bara að ég trúði ekki að þetta væri vinkona að segja þetta við aðra vinkonu, heldur trúði ég ekki að þetta væri á hlaðvarpsveitu. Þetta var opinn þáttur í hlaðvarpi.“
Hann segist hafa birt hljóðbútinn strax í Story á Instagram. „Ég man ég gerði það í bræði, og það getur gerst þegar þú ert triggeraður. Óréttlæti stuðar mig […] Ég man ég hugsaði: „Þetta er ógeðslega alvarlegt. Þetta er eitt það ljótasta sem ég hef heyrt.““
„Ég setti þetta beint inn, nefndi engin nöfn og ég var svo sem ekkert að spá í hver þetta var. Ég hef ekkert persónulegt á móti neinum eða neinni þar.“ Helgi segir að hann hefur aldrei – bæði fyrir þetta og eftir – fengið jafn mikið af skilaboðum á jafn stuttum tíma.
„Þá vissi ég líka að það að hafa sett þetta inn, að það hafi verið rétt, því það voru stelpur að skrifa að þeim leið hræðilega að hlusta á þetta,“ segir hann.
„En svo fattaði ég allt í einu, ég þarf að muna að hugsa um þolandann. Ég sendi á hana nokkrum mínútum eftir að ég birti […] Hún gaf mér blessun að halda þessu inni. En ég man samt að hún var greinilega að þjást.“
Fylgstu með Helga á Instagram og hlustaðu á hlaðvarpið Helgaspjallið á Spotify og Apple Podcasts.
Smelltu hér til að sjá hvar þú getur leitað hjálpar ef einhver er að beita þig eða einhvern sem þú þekkir ofbeldi.
