Diddy gæti átt þungan fangelsisdóm yfir höfði sér vegna gruns um mansal og skipulagða glæpastarfsemi. Rapparinn var handtekinn í New York fyrir rúmlega viku síðan eftir að niðurstaða ákærudómstóls lá fyrir.
Ákæruskjöl saksóknara varpa ljósi á skuggalegt líferni rapparans síðustu ár. Hann er sagður hafa haldið fjölmargar orgíur þar sem vændiskonur, eiturlyf og barnaolía í lítravís komu meðal annars við sögu. Réttara sagt fundust þúsund flöskur af barnaolíu heima hjá honum.
Marc Agnifilo, lögfræðingur Diddy, reyndi að útskýra þetta mikla magn af barnaolíu og sagði rapparann venjulega kaupa vörur í miklu magni og að það væri Costco verslun nálægt öllum heimilum hans.
Nú hefur talsmaður verslunarkeðjunnar stigið fram og sagt þetta ósatt.
Í samtali við TMZ sagði hann að engin Costco verslun í Bandaríkjunum selji umrædda barnaolíu frá Johnson‘s, það sé því ekki möguleiki að hann hafi keypt vöruna hjá þeim.
„Hann á stórt hús, hann kaupir í miklu magni. Ég held að það sé Costco verslun nálægt öllum heimilum hans,“ sagði lögfræðingur Diddy við TMZ fyrr í vikunni.
„Hefur þú setið á bílastæði fyrir framan Costco og séð hvað fólk labbar út með?“
