Einn sérstæðasti sérviðburðurinn á RIFF í ár, en hátíðin hefst á fimmtudag, er sýning á heimildarmyndinni Shelf Life (Best fyrir) ásamt ostakynningu frá MS og vínkynningu frá Mekka.
Þessi angandi menningarviðburður verður í Norræna húsinu föstudaginn 27. september og hefst 18:30 með smakki, en sýningin hefst svo hálftíma síðar og þar munu gestir kynnast hrífandi heimildamynd um matarmenningu og listina að lifa, svo og litríkum og sérfróðum karakterum um allan heim sem allir hafa sitt að segja um þroska, hrörnun, lífið, tilveruna og ostagerðarlistina.
Að lokinni sýningu verður boðið upp á spjall við Helga Pétursson, formann Félags eldri borgara og sálfræðinginn Sjöfn Evertsdóttur um kosti og gleði þess að eldast, en sjálfur segir Helgi það vera eitt mesta og albesta lífslánið.
„Ég er samt oftast í góðu skapi og það munar mestu á efri árunum.“
„Í þessum heimi er stórkostlegt að fá að eldast, þótt óneitanlega setji hroll að gömlum manni eins og mér þegar litið er til baka. Það syrgir mig óendanlega að okkur mannfólkinu hefur ekkert orðið ágengt. Við virðumst ekki vilja læra af sögunni. Slíkur er ófriðurinn og vargöldin að ég, 75 ára gamall maðurinn, er óttaslegnari en þegar ég var tólf ára á tímum kjarnorkuvár og kaldra stríða,“ segir Helgi.
„En fjandinn hafi það, ég er samt oftast í góðu skapi og það munar mestu á efri árunum,“ bætir hann við.
Sem fyrr segir hefst þessi angandi kvikmyndaveisla klukkan 18:30 á föstudag.
