Pálmi Gestsson, einn ástsælasti leikari þjóðarinnar, segir farir sínar ekki sléttar eftir að Facebook fjarlægði heldur saklausa færslu hans í morgun.

Pálmi segir frá þessu á Facebook-síðu sinni.

„Alltaf er maður að læra eitthvað nýtt! Fyrr í dag birti ég plakat Borgarleikhússins af sýningunni “Sýslumaður dauðans” sem verður frumsýnd fljótlega á Nýja sviðinu. Faceb fjarlægði þetta allt saman af því þetta braut einhverjar voða mikilvægar reglur og hótuðu mér öllu illu! Ja það er vandlifað,“ sagði Pálmi sem lét fylgja með skjáskot af skilaboðunum sem hann fékk frá Facebook.

Á vef Borgarleikhússins segir að Sýslumaður dauðans sé nýr, íslenskur, súrrealískur drama-gamanleikur.

„Ævar Birkisson missir föður sinn, Birki Ævarsson og á Útfararstofu Orfeusar fær Ævar tilboð sem hann getur ekki hafnað. Upphefst Kafkaískur leiðangur Ævars í leit að föður sínum þar sem hann tekst á við ævintýralegar kynjaverur en líka rannsóknarlögreglu, spjallþáttastjórnendur og síðast en ekki síst, Sýslumann Dauðans. Verkið er skapað inn í íslenskan veruleika og er fyndið, hjartnæmt og sprúðlandi af sköpunargleði.“

Höfundur verksins er Birnir Jón Sigurðsson og Stefán Jónsson er leikstjóri. Með hlutverk í leikritinu fara, auk Pálma, þau Birna Pétursdóttir, Haraldur Ari Stefánsson, Hákon Jóhannesson og Sólveig Arnarsdóttir.