Allen heldur úti hlaðvarpsþætti og í þætti sínum í síðustu viku ræddi hún við velska sjónvarpsmanninn Steve Jones. Í þættinum var víða komið við og komu gæludýr meðal annars við sögu. Á einum tímapunkti sagði Allen að hún hefði einu sinni fengið sér hund en ákveðið að skila honum eftir að hann át vegabréf hennar og barna hennar.
Allen sagði að þetta hafi valdið fjölskyldunni miklum vandræðum og varð meðal annars til þess að börnin komust ekki til Bretlands til að hitta föður sinn sem þar er búsettur. Vegabréfsáritanir hefðu glatast og þar sem þetta gerðist á tímum Covid-faraldursins hafi þetta orðið heljarinnar vesen.
Allen sagði svo frá því á Instagram-síðu sinni um helgina að hún hefði fengið yfir sig holskeflu ógeðslegra skilaboða og meira að segja líflátshótanir vegna ummæla sinna. Virðast dýravinir hafa tekið sig saman og sent henni hótanir og miður falleg skilaboð.
Allen útskýrði svo í færslunni að hún hefði ekki bara skilað hundinum eftir að hann át vegabréfin. Hann hafi í raun verið óalandi og hún hefði reynt ýmislegt til að þjálfa hann, „en það bara gekk ekki upp,“ sagði hún. Bætti hún við að hundurinn hefði verið með svo mikinn aðskilnaðarkvíða að hann gat ekki verið einn í tíu mínútur.
Bætti Allen við að hundaþjálfari hafi komið að málinu og allir verið sammála um að best væri að finna nýtt heimili fyrir hundinn.
