Áætlanir Guðrúnar Karls Helgudóttur, biskups Íslands, um þátttöku í 21 kílómetra hálfmaraþoni í Reykjavíkurmaraþoninu um næstu helgi eru í uppnámi eftir að nýr leiðtogi Þjóðkirkjunnar tognaði í 30 km utanvegahlaupi á dögunum. Meiðslin eru það hvimleið að Guðrún, sem var kjörin biskup Íslands í maí síðastliðnum,  þarf að láta sér nægja þátttöku í 3 kílómetra skemmtiskokki að þessu sinni.

Guðrún hafði ákveðið að hlaupa til styrktar Skjólinu, sem er úrræði fyrir konur sem glíma við heimilisleysi. Lét biskup sérstaklega skrá Skjólið hjá skipuleggjendum Reykjavíkurmaraþonsins til að vekja athygli á því góða starfi sem þar er unnið. Hafði Guðrún þegar safnað 111 þúsund krónum til styrktar málefninu og var komin nokkuð fram úr markmiði sínu fyrir hlaupið, sem var 100 þúsund krónur.

„Ég þarf að fara aðeins styttri vegalengd en ég ætlaði mér í þetta sinn en ég mun þó reyna eftir fremsta megni að standa væntingar þeirra sem heitið hafa á mig,“ segir Guðrún. Ekki hafi komið til greina að hætta við þó að haltrað verði í þetta sinn frekar en hlaupið. Þá hvetur hún alla sem vettlingi geta valdið að kynna sér starfsemi Skjólsins og styrkja starfsemina sem þar fer fram.

Nýr biskup Íslands er afar áhugasöm um hreyfingu og útivisti. Í viðtali við DV í vor ræddi hún hvernig að hún hóf útihlaup upp úr fertugu og hefur vart stoppað síðan. Hefur hún þegar hlaupið fjögur af sex stóru maraþonum heimsins og hefur einsett sér það markmið að ljúka þeim tveimur hlaupum á næstu árum.

Sjá einnig: Guðrún byrjaði að hlaupa maraþon árið 2018 – „Stundum sem ég prédikanir á hlaupum“