Handtökur hafa átt sér stað í rannsókn lögreglunnar í Los Angeles á andláti leikarans Matthew Perry. Frá þessu greina erlendir miðlar sem segja að handtökurnar hafi átt sér stað í umfangsmiklum lögregluaðgerðum í morgun. Ekki liggur fyrir hversu margir voru handteknir en í fréttum er vísað til „fjölda fólks“. Einn hina handteknu er sagður læknir og nokkrir munu vera fíkniefnasalar.

Í aðgerðunum lagði lögregla hald á tölvur, farsíma og önnur raftæki. Rannsóknin miðar að því að upplýsa hver varð leikaranum úti um lyfin sem drógu hann til bana.

Leikarinn fannst látinn í heitum potti við heimili sitt í október og krufning leiddi í ljós að hann hann lést eftir að hafa tekið mjög stóran skammt af lyfinu ketamín. Lyfið varð til þess að hann missti meðvitund í heita pottinum og drukknaði.

Leikarinn var í meðferð við þunglyndi og kvíða þar sem hann fékk litla skammta af ketamín. Sá skammtur sem hann hafði tekið fyrir andlátið var þó langt umfram meðferðarskammt og ljóst að hann hafi fengið lyfið með ólögmætum leiðum.

Talið er að þeir sem voru handteknir í morgun hafi í sameiningu hjálpað Perry að verað sér úti um lyfið.

TMZ greinir frá því að yfirvöld hafi eins fengið leitarheimild fyrir heimili leikkonunnar Brooke Mueller, fyrrverandi eiginkona Charlie Sheen. Hún mun þó ekki hafa verið handtekin. Eins hafi lögregla leitt í ljós að fleiri þekktar stjörnur hafi tengst undirheimum Hollywood.